Хитойда ота бир коса лағмон учун 2 ёшли қизини гаровга қолдирди

Хитойнинг Гуандун провинциясидаги ошхоналарнинг бирида ота икки ёшли қизини гаров сифатида қолдириб кетди. Бу ҳақда «РИА Новости» хабар қилди.

Таъкидланишича, эркак олти юан (0,9 доллар) турадиган бир коса лағмон сотиб олиш учун пули етмаган. Шунда у тамаддихона эгасига қизини гаров сифатида қолдиришини ва уни олиб кетиш учун эртага келишини маълум қилиб, ошхонани тарк этган.

Қизча отаси ортидан эргашишга ҳаракат қилган, бироқ эркак қизни ортга қайтарган. Бола йиғлашни бошлаган.

Тамаддихона ишчилари қизалоқни ошхонага олиб кириб, унга сут берган. Шундан сўнг полицияга хабар қилган.

Бир неча соатдан сўнг ота қайтган, лекин болани топа олмаган ва полицияга хабар берилгани учун ошхона эгасига бақиришни бошлаган.

«Эркак қизимни ташлаб кетмоқчи эмас эдим, шунчаки нақд пул топиш учун кетгандим деб туриб олди. Аммо бу иш кўп вақтни олган, чунки унинг мопеди аккумулятори ўтириб қолган ва уни заряд қилдиришга мажбур бўлган», — деб хабар қилинди полицияда.