«Олтин ҳумо» миллий кинотақдимоти, Сергелидаги уйлар муаммоси, муддатидан аввал озодликка чиқарилган Исломбек Тўлаганов ва куннинг бошқа хабарлари

11 апрелнинг эътиборга молик янгиликлари — «Дарё» дайжестида.

«Олтин ҳумо» миллий кинотақдимотида 2 йил ичидаги энг яхши фильм, актёр ва актриса аниқланди.

«Олтин ҳумо» миллий кинотақдимотида «Энг яхши ҳужжатли фильм» номинацияси ғолиби «Икки элнинг суюкли фарзанди» фильми деб топилди.

Актриса Муяссар Бердиқулова «Назира» фильмидаги роли учун «Энг яхши аёл роли» номига муносиб кўрилди.

Карим Мирҳодиев «Сабот» фильмидаги роли учун «Энг яхши эркак роли» номинацияси ғолиби бўлди.

Шунингдек, тақдимотнинг махсус мукофоти «Ўзбек киноматографиясига қўшган ҳиссаси учун» номинацияси ғолиблари бўлганларнинг ҳар бирига 5 000 000 сўмдан пул мукофоти берилди.

***

Тошкент шаҳри Сергели туманида қурилган арзон уй-жойларнинг кредит тўловлари оширилгани аҳоли норозилигига сабаб бўлмоқда.

Маълум бўлишича, Сергели туман аҳолисига орадан ярим йил ўтиб, қурилаётган «арзон» уй-жойлар 2018 йилнинг 29 майида 1 квадрат метр нархи ўртача 3 770 000 сўм этиб белгилангани ҳақида хат жўнатилган. Хатда ҳақиқий харажатларни ҳисобланиб, яна нархлар оширилиши мумкин деган ибора қўшиб қўйилган.

Олий Мажлисининг инсон ҳуқуқлари бўйича вакили (омбудсман) ҳамда депутат Расул Кушербоев  ушбу ҳолатга муносабат билдирди.

Ўзбекистон Республикаси Бош вазири Абдулла Арипов эса Сергелидаги янги уйлар нархи қайта кўриб чиқилишини маълум қилди.

***

Жасурбек Иброҳимовнинг ўлимида айбланиб, 6 йилга қамалган йигит озодликка чиқарилди.

Боровский коллежи ўқувчиси Жасурбек Иброҳимовнинг ўлими иши бўйича 2017 йил кузида судланган унинг коллеждоши — Исломбек Тўлаганов муддатидан аввал озодликка чиқарилган.

Жазонинг ўталмаган қисми 4 йил 5 ой 15 кун давомида ахлоқ тузатиш ишлари ва иш ҳақининг давлат ҳисобига 20 фоизи ушланиб қолишига алмаштирилди.

***

Тошкентда миллий либослар билан шуғулланувчи 34 яшар тадбиркор аёвсиз калтакланди.

Сурхондарёдаги халқаро бахшичилик фестивали учун либослар тайёрлаб берган 34 яшар тадбиркорга кўплаб жароҳат етказилгани айтилмоқда.

Тошкент шаҳар Ички ишлар бош бошқармаси тадбиркорга тан жароҳатлари етказган шахсларга нисбатан жиноий иш қўзғатилганини маълум қилди.

***

Фаттоҳ Шодиев Сирдарё вилоятини ободонлаштириш учун 40 миллиард сўм ажратди.

Мазкур маблағлар «Обод қишлоқ» дастури доирасида чекка қишлоқларини ободонлаштириш, аҳолини турмуш тарзини яхшилаш учун йўналтирилади.

Шунингдек, маблағнинг бир қисми Ховос туманида барпо этилаётган Хоvos city қурилишига сарфланиши кўзда тутилмоқда.