Олий судда қарздорликлар ундирилишида ўзаро ҳамкорликни такомиллаштиришга бағишланган видеоконференция тартибидаги йиғилиш ўтказилди. Бу ҳақда «Дарё»га Олий суд матбуот хизмати маълум қилди.
Йиғилишда Олий суд раисининг ўринбосари Холмўмин Ёдгоров суд ҳужжатларининг ижроси қонуний муддатларда тўлиқ таъминланиши судларнинг обрў-эътиборини ошириш, фуқароларнинг судга ишончини мустаҳкамлаш ва уларнинг манфаатларини кафолатли ҳимоя қилишда ўта муҳим ўрин тутиши, шу боис ҳар бир судья ўзи қабул қилган қарорнинг ижросини таъминлашга алоҳида масъулият билан ёндошиши зарурлигини таъкидлади.
Президентнинг 2018 йил 13 июлдаги «Суд-ҳуқуқ тизимини янада такомиллаштириш ва суд ҳокимияти органларига ишончни ошириш чора-тадбирлари тўғрисида»ги фармонида бу борада муҳим вазифалар белгилаб берилди. Фармонда белгиланган вазифалар ижросини таъминлан мақсадида Олий суд ва Бош прокуратура ҳузуридаги Мажбурий ижро бюроси билан қўшма кўрсатма имзоланиб, ижро қилиш учун жойларга юборилди.
Мазкур қўшма кўрсатманинг ижросини тўлиқ таъминлаш мақсадида вилоят ва туманлар миқиёсида ишчи гуруҳлари ташкил қилиниб, фаолияти йўлга қўйилди.
Йиғилишда бу борада кўрилаётган чора-тадбирларга қарамай суд қарорларининг ижроси талаб даражасида эмаслиги қайд этиб ўтилди. Жумладан, 2018 йил 13 июль кунидан 2019 йил 5 апрелга қадар республика судлари томонидан жами 611 808 141 474 сўмлик 970 562 та ижро ҳужжат Бош прокуратура ҳузуридаги Мажбурий ижро бюроларига ижро қилиш учун юборилган.
Шундан бугунги кунга қадар 294 676 264 638 сўмлик (48,2 фоиз) 577 534 та ижро ҳужжати амалда ижро қилинган, 132 431 643 369 сўмлик (21,6 фоиз) 96 221 та ижро ҳужжати эса ижро қонунининг бошқа моддаларига асосан тугатилган. Бугунги кунда 184 700 233 467 сўмлик (30,2 фоиз) 296 807 та ижро ҳужжатининг ижроси таъминланмаган.
Йиғилишда бундай ҳолат билан асло муроса қилиб бўлмаслиги, ҳар бир суд ҳужжати ижросини таъминлашга эришиш учун барча чора-тадбирларни кўриш зарурлиги қайд этилди.
Шунингдек, йиғилишда судлар томонидан Мажбурий ижро бюросига ижро ҳужжатларини электрон тарзда юбориш амалиётини йўлга қўйиш масаласи ҳам муҳокама қилинди.
Изоҳ (0)