Андижон давлат университети профессори Райимжон Алиевнинг «Қайта тикланадиган энергия манбаларининг физикаси ва атроф муҳит барқарорлиги бўйича магистрлик дастурини такомиллаштириш орқали талабаларнинг ижодий ва инновацион фаолиятини рағбатлантириш» мавзусидаги лойиҳаси Жаҳон банки танловида ғолиб деб топилди. Бу ҳақда университет матбуот котиби Шарофиддин Ҳошимжонов «Дарё»га хабар берди.
Ўзбекистон Президентининг 2017 йил 22 мартдаги «Халқаро ривожлантириш ассоциацияси иштирокидаги олий таълим муассасалари моддий-техника базасини мустаҳкамлаш лойиҳасини амалга ошириш чора-тадбирлари тўғрисида»ги қарори ижросини таъминлаш бўйича Жаҳон банки томонидан мабалағлар ажратилган эди. «Олий таълим муассасаларининг моддий-техника базасини мустахламлаш» лойиҳаси доирасида Академик инновациялар фонди ташкил этилиб, 2018 йил давомида лойиҳалар танлови ўтказилди. Мазкур танловда Андижон давлат университети профессори Райимжон Алиевнинг лойиҳаси ғолиб деб топилди.
Лойиҳа 2019—2020 йиллар давомида Жаҳон банки маблағлари ҳисобидан молиялаштирилиб, унинг қиймати 140 000 долларни ташкил этади.
Техника фанлари доктори, профессор Райимжон Алиэвнинг таъкидлашича, лойиҳага ажратилган маблағлар ҳисобига АДУдаги илмий лаборатория қайта жиҳозланиб, профессор ўқитувчилар Европанинг энг таниқли университетларида малака оширади. Шунингдек, Европа ОТМларининг етакчи профессорлари университетда ёш олимларнинг тадқиқотларига илмий раҳбарлик қилиб, кадрлар тайёрлашда «таълим – фан – ишлаб чиқариш» интеграциясини кучайтиришга жалб этилади. Қисқача қилиб айтганда, мазкур лойиҳа Ўзбекистон миқёсида йўлга қўйилган «Олий таълим муассасаларининг моддий-техника базасини мустаҳкамлаш» лойиҳасининг икки бош йўналишдаги танловлари: «Олий таълим муассасалари ва саноат алоқасини кучайтириш» ҳамда «Ўқитиш амалиётини такомиллаштириш» вазифаларини ҳал этишга йўналтирилган. Лойиҳани амалга ошириш учун университет томонидан ташкил этилган консорциумга мамлакатдаги нуфузли илмий тадқиқот институтлари, ишлаб чиқариш корхоналаридан ташқари Берлин техника университети (Германия), София кимё-технология ва металлургия университет (Болгария)лари ҳам киритилган.
Изоҳ (0)