Андижонда 120 дан ортиқ дори-дармон ишлаб чиқарадиган фармацевтика корхонаси фойдаланишга топширилди

Андижон шаҳридаги собиқ «Андижонмаш» акциядорлик жамияти ҳудудида «Biomediks» масъулияти чекланган жамиятига қарашли экспортбоп дори-дармон воситаларини ишлаб чиқаришга иҳтисослаштирилган корхона фойдаланишга топширилди. Бу ҳақда «Дарё» мухбири хабар бермоқда.

Корхонанинг очилиш маросимида иштирок этган Андижон вилояти ҳокими Шуҳратбек Абдураҳмонов сўнгги икки йил давомида вилоятда инсулин, шприц ва тиббиёт қўлқоплари ишлаб чиқарувчи корхоналар фаолияти йўлга қўйилганлиги, шундай объектлар сони яна биттага кўпайганини билдириб, келгусида бу соҳада амалга оширилиши белгиланган лойиҳалар ҳақида фикр юритди.

Давлат раҳбарининг «Андижон-фарм» эркин иқтисодий зонасини ташкил этиш тўғрисидаги фармони ижроси доирасида Андижон туманидаги 50 гектар майдонда 15 дан ортиқ фармацевтика корхонаси ишга туширилиши таъкидланди.

Корхона  мутахассис-технологи Ғофуржон Тўйчиевнинг маълум қилишича, йиллик ишлаб чиқариш қуввати 14 миллион қадоқни ташкил этувчи лойиҳа тадбиркорнинг 7,2 миллиард сўмлик ўз улуши ва «Ипотека банк» вилоят филиалидан олинган 17,8 миллиард сўмлик кредит маблағлари эвазига бунёд этилган. Маҳсулотларни тайёрлаш учун технологиялар Хитойдан олиб келинган. Натижада 70 нафар фуқаронинг бандлиги таъминланган.

—Айни пайтда корхонамизда 120 турдаги таблетка, капсула, свеча, сироп, настойка шаклидаги дори воситаларини ишлаб чиқариш йўлга қўйилган, — дейди МЧЖ раҳбари Ҳикматилло Тошхўжаев. – Маҳсулотларимиз асосан ички бозор ва қисман Марказий Осиё мамлакатлари учун экспортга йўналтирилади.

Тадбирда «Андижон-фарм» саноат зонасида фаолият олиб бориш истагини билдираётган ҳиндистонлик бир гуруҳ фармацевтика саноати вакиллари ҳам иштирок этди.