4 апрель, пайшанба куни Олий суд раисининг ўринбосари, судьялари ва Бош прокуратура ходимлари Балиқчи ва Қўрғонтепа туманларида аҳолининг жиноий, фуқаролик, маъмурий ва иқтисодий судларга оид мурожаатлари юзасидан сайёр қабул ўтказди. Бу ҳақда «Дарё» мухбири хабар бермоқда.
Фото: Рустам ЭшоновЖиноят ишлари бўйича вилоят суди судья катта ёрдамчиси Комроншоҳ Расуловнинг маълум қилишича, қабуллар давомида жазони ижро этиш муассасидан озод қилинган, ҳозирда озодликдан маҳрум қилиш билан боғлиқ бўлмаган жазоларни ўтаётган, муқаддам судланган 122 нафар шахснинг мурожаати тингланиб, 82 таси жойида ҳал этилган.
35 нафар мурожаатчига тегишли тартибда мурожаат қилиш ҳуқуқи тушунтирилган, яна 5 нафар кишининг аризаси назорат тартибида қабул қилинган. Шунингдек, шу ернинг ўзида 3 та уй-жой низоси ҳақидаги фуқаролик ишлари кўрилиб, Олий суд фуқаролик ишлари бўйича судлов ҳайъати томонидан якуний қарор қабул қилинди.
Андижон тумани «Куйган ёр» маҳалласида яшовчи Воҳиджон Отахонов 2016 йилда Жиноят ишлари бўйича Избоскан тумани суди ҳукмига асосан Жиноят Кодексининг 273-моддаси (Гиёвандлик воситалари, уларнинг аналоглари ёки психотроп моддаларни ўтказиш мақсадини кўзлаб кўп бўлмаган миқдорда қонунга хилоф равишда тайёрлаш, олиш, сақлаш, ташиш ёки жўнатиш, шунингдек уларни кўп бўлмаган миқдорда қонунга хилоф равишда ўтказиш) 5-қисми билан беш йил муддатга озодликдан маҳрум қилиш жазоси билан судланган.
Қилмишидан пушаймон эканлигини, енгиллик беришларини сўраб, 2018 йилда қилган мурожаатига кўра ЖИБ Пискент туман суди томонидан жазонинг қолган қисми аҳлоқ тузатиш ишларига алмаштирилган. У қабул давомида жазодан муддатидан илгари озод қилишларини сўраб мурожаат қилди. Шу куни унинг иши сайёр суд мажлисида қайтадан кўрилиб, мурожаати каноатлантирилди.
«Билиб билмасдан хато қилдим ва бунинг эвазига тегишли жазоимни ҳам олдим. Президентимиз томонидан менга яна бир бор имконият берилди. Энди бундан фақат тўғри йўлда фойдаланишга ҳаракат қиламан», — дейди Воҳиджон Отахонов.
«Бир неча йиллардан буён тадбиркорлик билан шуғулланаман. Фаолиятим давомида хавфсизлик ва сифат талабларига етиарли даражада эътибор қаратмагандим. Қонун барчага баробар деганларидек, масъулиятсизлигим натижасида туман суди томонидан менга ЖКнинг 186- моддаси (Хавфсизлик талабларига жавоб бермайдиган товарларни ўтказиш мақсадини кўзлаб ишлаб чиқариш, сақлаш, ташиш ёхуд ўтказиш, ишлар бажариш ёки хизматлар кўрсатиш) билан икки йил муддатга аҳлоқ тузатиш ишлари жазоси тайинланган. Бугун жазодан шартли равишда озод қилишларини сўраб мурожаат қилдим. Бу бўйича судьялар томонидан тегишли тушунтиришлар берилиб, аризам қаноатлантирилди. Бундан жуда хурсандман. Келгусида юртимиз равниқига фақат ҳалол йўл орқали ҳисса қўшишга ваъда бераман», — дейди Олтинкўл тумани Мақсад маҳалласида истиқомат қилувчи Абдулхалил Асобоев.
Сайёр қабул давомида ахлоқ тузатиш ишлари жазосини ўтаётган 65 нафар шахс Жиноят кодексининг тегишли моддалари тартибида шартли равишда озод қилинди.
Изоҳ (0)