Тошкентда ўтказилган «Россия—Ўзбекистон таълим форуми»да Рязань давлат агротехнология университети ва Наманган муҳандислик-технология институти ўртасида ҳамкорлик шартномаси имзоланган эди. Бу ҳақда «Дарё»га институт матбуот хизмати хабар бермоқда.
Мазкур ҳамкорлик шартномасида белгиланган тадбирларни амалга ошириш ҳамда институт профессор-ўқитувчилари, тадқиқотчилари ва талабалар учун мастер-класс ва дарс машғулотлари ўтказиш мақсадида Рязань давлат агротехнология университетининг ўқув ишлари бўйича проректори, техника фанлари доктори, профессор Сергей Боречев Наманганга келди.
Ташриф доирасида россиялик меҳмон иштирокида институт раҳбарияти билан расмий учрашув ўтказилди. Унда ҳамкорлик шартномаси асосида 2019 йилда амалга ошириладиган ишлар бўйича музокаралар олиб борилди. Сергей Боречев иштирокида факультетлар деканлари, кафедралар мудирлари ва етакчи профессор-ўқитувчилар билан ўзаро ҳамкорликни ривожлантириш борасида қилинадиган ишлар бўйича семинар ташкил қилинди.
Рязань давлат агротехнология университети проректори институтнинг «Технологик машиналар ва жиҳозлар» йўналиши талабалари учун уч кунлик дарс машғулотларини олиб борди.
Профессор Сергей Боречевнинг Наманганга сафари давомида иккита олий таълим муассасалари ҳамкорлигини ҳар томонлама ривожлантириш, 2019 йилда НамMTИ талабалари ва профессор-ўқитувчиларини стажировкага юбориш, Россия университетидан профессор-ўқитувчиларни НамMTИ ўқув жараёнига жалб қилиш, онлайн семинарлар ва машғулотлар ўтказиш ҳамда ҳамкорликда ўқув-услубий адабиётлар яратиш бўйича келишувларга эришлди.
Изоҳ (0)