Тошкент шаҳар ҳокимлиги томонидан «Республика тадбиркорликни қўллаб-қувватлаш маркази» МЧЖга ер участкаси ажратиш бўйича ҳуқуқ ва қонуний манфаатлар қўпол равишда бузилмоқда. Бу муаммо юзасидан ушбу марказ директори А.Боқижонов ЎзАда чиқиш қилган.
Вазирлар Маҳкамаси комиссиясининг 2018 йил 22 июндаги 01-05/121-1-сонли баёнига асосан мазкур тадбиркорлик субъектига ер участкасини жойлашуви келишилган бўлиб, Тошкент шаҳар ҳокимлигига ер участкасини ажратиш бўйича топширик берилган ҳамда баённи ижросини назорат қилиш қурилиш вазири А.Тўхтаев зиммасига юклатилган.
Бироқ, барча тегишли хулоса ва келишувлар олинганидан сўнг ҳам ушбу масала Вазирлар Маҳкамасининг баёнида кўрсатилган топшириқни бузган ҳолда Тошкент шаҳар ҳокимлиги томонидан сунъий равишда пайсалга солинмоқда.
Вазирлар Маҳкамасининг топшириқлари давлат ва хўжалик бошқаруви органлари, Қорақалпоғистон Республикаси Вазирлар Кенгаши, Тошкент шаҳар ва вилоятлар ҳокимликлари, бошқа органлар ва ташкилотлар ҳужжат юборган кундан бошлаб 10 календар кун давомида ижро этилиши лозимлиги белгиланган.
«Республика тадбиркорликни қўллаб-қувватлаш маркази» МЧЖ бир неча йиллардан буён ер участкасини ажратилиши бўйича ҳужжатларни тайёрлаш ва тасдиқлатиш жараёнини бошдан ўтказиб келмоқда. Бунинг натижасида эса тадбиркорлик субъекти ортиқча бюрократик тўсиқлар, вақт йўқотиш, маънавий ва моддий зарарларга дуч келди.
Мазкур масала бўйича Президентнинг тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакили томонидан Тошкент шаҳар ҳокимлигига 2018 йилнинг 23 ноябрида 01-03-862/2-сонли давлат органи ёки бошқа ташкилот ёхуд мансабдор шахс томонидан ишни якунига етказиш тўғрисида хулоса юборилган.
Шунга қарамасдан, Тошкент шаҳар ҳокимлиги томонидан мазкур хулосада кўрсатиб ўтилган айрим тадбиркорлик субъектларининг масаласи субъектив танлов асносида ижобий ҳал этилди.
Бундан шуни хулоса қилиш мумкинки, Президентнинг қонунга мувофиқ ваколатларга эга вакили шаҳар ҳокимлиги олдида кучсизлик қилди.
Хусусан, мазкур масаланинг кўриб чиқилиши пойтахт ҳокимлиги томонидан норматив-ҳуқуқий ҳужжатларни бузган ҳолда сунъий равишда чўзилмоқда. Бу эса ўз навбатида тадбиркорлик субъектларига нисбатан иккиюзлама стандартларининг қўлланилишидан далолат беради.
Бугунги кунда ер участкасини ажратиш бўйича ҳужжатларнинг Тошкент шаҳар архитектура ва қурилиш бош бошқармаси томонидан Тошкент шаҳар ҳокимлигига бир неча бор киритилиши, барча ҳудудий давлат органлари ва ташкилотларнинг ер участкасини ажратиш бўйича олинган ижобий хулосаларига қарамайга, бу масала эътиборсиз қолмоқда.
Caвол туғилади: Тошкент шаҳар ҳокимлиги Ўзбекистон ҳукумати ва Президент ҳузуридаги вакилдан кучлироқми? Йўқса, нега масъул идораларнинг кўрсатмалари шунча вақтдан бери бажарилмай келинмоқда?
Изоҳ (0)