Жорий йилнинг ўтган даврида Термиз туманида йўл-транспорт ҳодисалари натижасида ўлим билан боғлиқ қатор жиноятлар юз берди. Иккита мудҳиш қотиллик жинояти содир этилди, деб ёзади ЎзА.
Тумандаги Қорахон маҳалласида мазкур жиноятлар ҳамда одам ўлими билан боғлиқ йўл-транспорт ҳодисалари Ички ишлар вазирлигининг масъул ходими, подполковник Х.Давлатов, Сурхондарё вилояти ички ишлар бошқармаси бошлиғи ва туман прокурори, вилоят ИИБ Йўл ҳаракати хавфсизлиги бошқармаси бошлиғи томонидан туман жамоатчилик вакиллари ва жиноят юз берган маҳаллалар аҳолиси иштирокида муҳокама этилди.
Янги йилнинг 8 январь куни кеч соат 10:00 ларда Ж.Қурбонов Термиз тумани Шароф Рашидов номидаги маҳаллада яшайдиган собиқ қайнотасининг уйига маст ҳолда келиб, хонадон эгаларини чақиради. А.Шомирзаев ва отаси чиқиб келгач, орада зиддият пайдо бўлади. Шу пайт А.Шомирзаев ошхона пичоғи билан Ж.Қурбоновнинг орқа чап ва ўнг кўкрагининг пастқи қисмига уч марта уриб, жиддий тан жароҳати етказади. Жабрланувчи воқеа жойидан қочиб, ўттиз метрча юргач, йиқилиб, воқеа жойида вафот этади.
Қорахон маҳалласида яшовчи Г.Жумаеванинг қасддан ўлдирилиши билан боғлиқ жиноят ҳам маҳалла юзини ерга қаратди. Марҳума аёлнинг қизи шу йил 4 март куни туман ички ишлар идорасига мурожаат этиб, онаси Г.Жумаеванинг 14 февраль куни соат 12:00 ларда жияни коллеж талабаси I.Тўхтаева қасддан ўлдириб, турмуш ўртоғи Ш.Хурсандов билан бирга ҳовлисидаги молхонага кўмиб ташлаганини маълум қилади. Молхона кўздан кечирилганида Г.Жумаеванинг мурдаси қотиллик аломатлари билан топиб олинади.
Ҳар икки ҳолат бўйича ҳам Ўзбекистон Рспубликаси Жиноят кодексининг 97-моддаси 1-қисми билан жиноят иши қўзғатилган.
Вилоят ички ишлар бошқармаси бошлиғи, полковник Ш.Сотволдиев ушбу жиноятларнинг юзага келиш сабаби ва омиллари хусусида фикр юритиб, жамоат ташкилотлари, маҳалла фаоллари ва профилактика инспекторининг масъулиятсизлигига, уларнинг оилалар муҳитини атрофлича ўрганишда йўл қўйган лоқайдлигига эътиборни қаратди.
«Бу жиноятларнинг содир этилиши учун ҳар иккала оилада ҳам носоғлом муҳит юзага келган. Лекин бундан хотин-қизлар қўмитаси ҳам, маҳалла фаоллари ва профилактика инспектори ҳам тўлиқ хабардор бўлмаган. Мазкур оилалардаги муҳитни чуқур ўрганмаган. Мамлакатимизда содир этилиши мумкин бўлган жиноятларга қарши жиддий курашилаётган, ҳуқуқбузарликларнинг олди олинаётган бир пайтда масъулиятсизлик мудҳиш қотилликни юзага келтирган. Албатта, жиноятга қўл урган шахсларга нисбатан қонун устуворлиги таъминланади. Бироқ, бундай ҳолатларнинг юз беришига бепарволик билан қараган шахслар виждони қийналмайдими?», – дейди Ш.Сотволдиев.
«Жорий йилнинг ўтган даврида Термиз туманида йўл-транспорт ҳодисалари билан боғлиқ ўлим ҳолатларининг кўпайгани ҳам ачинарлидир. Туманда содир бўлаётган аянчли бу ҳодисалар давлат ва нодавлат ташкилотлари, кенг жамоатчилик вакилларини жиддий ташвишга солиши керак эмасми? Ахир, инсон тақдири билан боғлиқ бу ҳодисалар йўл ҳаракати иштирокчиларининг ҳаракатланиш маданияти пастлиги, етарли билимга эга эмаслиги ва йўл ҳаракати қоидаларини назар-писанд қилмаслик оқибатида келиб чиқмаяптими? Ҳайдовчиларнинг белгиланганидан юқори тезликда ҳаракатланаётгани, маст, шунингдек, кучли чарчоқ ва уйқу ҳолатида транспорт воситаларини бошқариш, тунги пайтларда айрим пиёдаларнинг спиртли ичимлик таъсирида ҳаракатланиши ҳам ана шундай фожеали воқелар билан якун топмоқда», — дейилади хабарда.
Муҳокама чоғида ўлим билан боғлиқ йўл-транспорт ҳодисалари чуқур таҳлил қилиниб, бу борадаги вазиятга холисона баҳо берилди. Фуқароларнинг ўзини ўзи бошқариш органлари, ҳудуддаги айрим профилактика инспекторлари, Ёшлар иттифоқи ва маҳаллалар фаоллари, «Фидокор ёшлар отряди»нинг бундай вазиятни ўнглашда ўрни сезилмаётгани таъкидланди.
Шу ўринда бир нарсани қайд этиш лозимки, ҳудудимизнинг осуда, ободлиги ва хотиржам ҳаёти учун барчамиз масъулмиз. Зеро, содир этилаётган жиноятлар ҳали айрим маҳаллаларда ана шу масъуллик туйғуси тўлиқ ҳис этилмаётганидан, жойларда ҳамон бепарволик қусури мавжудлигидан дарак бермоқда. Ваҳоланки, тинч, хотиржам яшаш учун нафақат кўча-куй балки, носоғлом муҳит шаклланаётган қўни-қўшнилар ва уларнинг фарзандларига ҳам бееътибор бўлмаслик лозим.
Изоҳ (0)