Joriy yilning o‘tgan davrida Termiz tumanida yo‘l-transport hodisalari natijasida o‘lim bilan bog‘liq qator jinoyatlar yuz berdi. Ikkita mudhish qotillik jinoyati sodir etildi, deb yozadi O‘zA.
Tumandagi Qoraxon mahallasida mazkur jinoyatlar hamda odam o‘limi bilan bog‘liq yo‘l-transport hodisalari Ichki ishlar vazirligining mas’ul xodimi, podpolkovnik X.Davlatov, Surxondaryo viloyati ichki ishlar boshqarmasi boshlig‘i va tuman prokurori, viloyat IIB Yo‘l harakati xavfsizligi boshqarmasi boshlig‘i tomonidan tuman jamoatchilik vakillari va jinoyat yuz bergan mahallalar aholisi ishtirokida muhokama etildi.
Yangi yilning 8-yanvar kuni kech soat 10:00 larda J.Qurbonov Termiz tumani Sharof Rashidov nomidagi mahallada yashaydigan sobiq qaynotasining uyiga mast holda kelib, xonadon egalarini chaqiradi. A.Shomirzayev va otasi chiqib kelgach, orada ziddiyat paydo bo‘ladi. Shu payt A.Shomirzayev oshxona pichog‘i bilan J.Qurbonovning orqa chap va o‘ng ko‘kragining pastqi qismiga uch marta urib, jiddiy tan jarohati yetkazadi. Jabrlanuvchi voqea joyidan qochib, o‘ttiz metrcha yurgach, yiqilib, voqea joyida vafot etadi.
Qoraxon mahallasida yashovchi G.Jumayevaning qasddan o‘ldirilishi bilan bog‘liq jinoyat ham mahalla yuzini yerga qaratdi. Marhuma ayolning qizi shu yil 4-mart kuni tuman ichki ishlar idorasiga murojaat etib, onasi G.Jumayevaning 14-fevral kuni soat 12:00 larda jiyani kollej talabasi I.To‘xtayeva qasddan o‘ldirib, turmush o‘rtog‘i Sh.Xursandov bilan birga hovlisidagi molxonaga ko‘mib tashlaganini ma’lum qiladi. Molxona ko‘zdan kechirilganida G.Jumayevaning murdasi qotillik alomatlari bilan topib olinadi.
Har ikki holat bo‘yicha ham O‘zbekiston Rspublikasi Jinoyat kodeksining 97-moddasi 1-qismi bilan jinoyat ishi qo‘zg‘atilgan.
Viloyat ichki ishlar boshqarmasi boshlig‘i, polkovnik Sh.Sotvoldiyev ushbu jinoyatlarning yuzaga kelish sababi va omillari xususida fikr yuritib, jamoat tashkilotlari, mahalla faollari va profilaktika inspektorining mas’uliyatsizligiga, ularning oilalar muhitini atroflicha o‘rganishda yo‘l qo‘ygan loqaydligiga e’tiborni qaratdi.
“Bu jinoyatlarning sodir etilishi uchun har ikkala oilada ham nosog‘lom muhit yuzaga kelgan. Lekin bundan xotin-qizlar qo‘mitasi ham, mahalla faollari va profilaktika inspektori ham to‘liq xabardor bo‘lmagan. Mazkur oilalardagi muhitni chuqur o‘rganmagan. Mamlakatimizda sodir etilishi mumkin bo‘lgan jinoyatlarga qarshi jiddiy kurashilayotgan, huquqbuzarliklarning oldi olinayotgan bir paytda mas’uliyatsizlik mudhish qotillikni yuzaga keltirgan. Albatta, jinoyatga qo‘l urgan shaxslarga nisbatan qonun ustuvorligi ta’minlanadi. Biroq, bunday holatlarning yuz berishiga beparvolik bilan qaragan shaxslar vijdoni qiynalmaydimi?”, – deydi Sh.Sotvoldiyev.
“Joriy yilning o‘tgan davrida Termiz tumanida yo‘l-transport hodisalari bilan bog‘liq o‘lim holatlarining ko‘paygani ham achinarlidir. Tumanda sodir bo‘layotgan ayanchli bu hodisalar davlat va nodavlat tashkilotlari, keng jamoatchilik vakillarini jiddiy tashvishga solishi kerak emasmi? Axir, inson taqdiri bilan bog‘liq bu hodisalar yo‘l harakati ishtirokchilarining harakatlanish madaniyati pastligi, yetarli bilimga ega emasligi va yo‘l harakati qoidalarini nazar-pisand qilmaslik oqibatida kelib chiqmayaptimi? Haydovchilarning belgilanganidan yuqori tezlikda harakatlanayotgani, mast, shuningdek, kuchli charchoq va uyqu holatida transport vositalarini boshqarish, tungi paytlarda ayrim piyodalarning spirtli ichimlik ta’sirida harakatlanishi ham ana shunday fojeali voqelar bilan yakun topmoqda”, — deyiladi xabarda.
Muhokama chog‘ida o‘lim bilan bog‘liq yo‘l-transport hodisalari chuqur tahlil qilinib, bu boradagi vaziyatga xolisona baho berildi. Fuqarolarning o‘zini o‘zi boshqarish organlari, hududdagi ayrim profilaktika inspektorlari, Yoshlar ittifoqi va mahallalar faollari, “Fidokor yoshlar otryadi”ning bunday vaziyatni o‘nglashda o‘rni sezilmayotgani ta’kidlandi.
Shu o‘rinda bir narsani qayd etish lozimki, hududimizning osuda, obodligi va xotirjam hayoti uchun barchamiz mas’ulmiz. Zero, sodir etilayotgan jinoyatlar hali ayrim mahallalarda ana shu mas’ullik tuyg‘usi to‘liq his etilmayotganidan, joylarda hamon beparvolik qusuri mavjudligidan darak bermoqda. Vaholanki, tinch, xotirjam yashash uchun nafaqat ko‘cha-kuy balki, nosog‘lom muhit shakllanayotgan qo‘ni-qo‘shnilar va ularning farzandlariga ham bee’tibor bo‘lmaslik lozim.
Izoh (0)