Болгарияда полиция намойишчиларга қарши газ баллончаларини ишлатди, лекин кучли шамол туфайли у ўзларига тегди (видео)

16 март куни Болгариянинг София шаҳрида ҳозирги ҳукуматга қарши норозилик намойиши бўлиб ўтди. NOVA маҳаллий каналига кўра, Болгария Халқ йиғини биноси ёнида байроқлар, плакатлар билан ўн мингдан ортиқ одам мавжуд сиёсий тизимни ўзгартириш талаблари билан йиғилди. Бу ҳақда TJournal хабар бермоқда.

Намойишчилар аввал кўчаларни тўсиб қўйган ва кейин ҳукумат биносига киришга ҳаракат қилган. Халқ йиғини биносини қўриқлаган полициячилар қалампир спрейи гази ишлатган. Бироқ, буйруқ берган офицер кучли шамолни инобатга олмади — бунинг оқибатида газнинг асосий қисми полициячиларнинг юзларига сепилди.

Бу воқеа Болгария телеканалларидан бирида эфирга узатилди. Маҳаллий аҳолидан бўлган Яаспер Неве эса бу видео акс этган лавҳани ижтимоий тармоқларга жойлади.

Кейинроқ Неве: «Болгария тинч мамлакат, норозиликлар камдан-кам ҳолларда тўқнашувларга айланади. Бу газни ишлатишда полициянинг тажрибасизлиги ҳам шундан далолат», — деб қўшиб қўйди.

Bulgarian police used pepper spray against protesters in front of parliament, but didn't take the wind direction into account pic.twitter.com/B8b7uQyIEG

— Jasper Neve (@JasperNeve) March 17, 2019