«Дарё» мухбири Фарҳод Норбўтаев Самарқанддаги мактаб-интернатидаги даҳшатлар қанчалик ҳақиқатга яқин эканлиги юзасидан журналистик суриштирув олиб бормоқда. Хусусан, Самарқанддаги 64-ихтисослаштирилган махсус мактаб-интернати тарбияланувчиси Суҳроб Омонов Шуҳрат Садинов иши олдиндан режалаштирилганлигини ҳақида гапириб берган эди.
«Дарё» мухбири олиб бораётган журналистик суриштирув жараёнида собиқ директор Шуҳрат Садинов, тарбиячилар Шерзод Очилов ва Зухриддин Салимовнинг биринчи инстанция ва апелляция судида иштирок этиб гувоҳлик берган мактаб-интернатининг тарбияланувчиси Бобур Каримов судда ёлғон кўрсатма берганлигини тан олди.
– Сайёра Мансурованинг кўрсатмаси асосида апелляция судида ёлғон гувоҳлик бердим. Судьяга ҳақиқатни айтсам ҳимоя қиласизларми дедим. Сўнг улар менга нос юттирганлиги, урганлиги тўғрисида кўрсатма бериб, судда гувоҳлик бераётганларни пора олганлиги, улар ёлғон гапираётганлигини айтдим. Судга чақиргансизлар, аммо мени жўнатмай олиб қолишди, деб судьяни чалғитдим, — дейди Бобур Каримов.
Ўз фикрига эга бўлмаган Бобур Каримов Сайёра Мансурова берган топшириқ асосида судда гувоҳлик берган. Шуҳрат Садинов билан боғлиқ воқеалар содир бўлганида у таътилда ўз уйида бўлган.
– Мен таътилда эдим. Таътилдан келганимдан сўнг шу ишлар бўлган экан. Мен бу ишга ўзим билмаган ҳолда қандайдир аралашиб қолдим. Мен биринчи гуруҳнинг командири эдим. Биринчи инстанция суди пайтида Сайёра Мансурова менга йиғлаб келди. Улар менга нимага туҳмат қилишяпти, Беҳрузни мен ундай қилмаганманку деб йиғлади, — дейди Бобур Каримов. – Йиғлаганидан кейин мени кўнглим бўшаб қолди. Кейин »Мен сизга ёрдам бераман» дедим. Шундай деганимдан сўнг «Сен Шуҳрат Садиновни ёмонлайсан» деди. Мен «Фақат Шуҳрат Садиновнинг ўзини айблайман лекин бошқасини айтмайман» дедим. Кейин Сайёра муаллимга бир нечта тарбиялачиларни номини айтдим.
Сайёра Мансурованинг кўрсатмаси асосида, Бобур Каримов судьяга мактаб-интернатининг ўқитувчиси Машҳура исмли ўқитувчиси телефон орқали адвокат билан гаплаштирганлигини айтган. Унинг олдида Назира исмли ўқитувчи бўлган деб қўшимча қилган. Шунингдек, Жўрабек исмли тарбиячи кечқурун нарса олиб келаётгани, болаларга пул бераётганлигини қўшимча қилган.
– Аслида мен ҳеч ким билан гаплашмаганман. Ҳеч ким менга нарса олиб бермаган. Судга борадиган кунимиз менинг исм-фамилям келмаган экан. Кейин Сайёра Мансурова директор ўринбосарига пўписа қилиб, «Сиз болани атайлаб олиб қоляпсиз» деди. Мен судга бормадим, — дейди Бобур Каримов. – Сайёра Мансурова судда иштирок этишим учун Муҳаммад Ўктамовга судьядан мени чақиртиришни сўраши кераклигини айтди. Сайёра опанинг кўрсатмаси асосида судьядан ўзимни ҳимояга олишини сўрадим. Судга мени чақиришганда ёлғон гапларни айтдим. «Агар айтмасанг сени кейинги ишларингда ёмон бўлади» деди.
Бобур Каримовнинг айтишича, аслида бу ишлар бўлмаганди. Мактаб-интернатидаги Машҳура исмли ўқитувчи ҳеч ким билан телефонда гаплаштирмаган. Жўрабек исмли тарбиячи ҳеч кимга пул бермаган. Сайёра Мансурова уни кўнглини бўшатиб, психологик таъкир ўтказганлиги учун уни гапларига ишона бошлаган.
– Ёзда бу ишлар бўлганидан кейин Маъруф исмли тарбиячининг сменасида Суҳроб Омонов мени мазам йўқ деди. Сайёра Мансурова унга битта дори бердида. У дорини ичганидан кейин Суҳроб Омоновнинг тоби қочиб қолди. Кейин Маъруф ака тез ёрдам машинасида уни шифохонага олиб борди, — дейди Бобур Каримов. – Ўшанда Сайёра Мансурова Суҳроб Омоновга қандайдир дори бериб унинг тобини қочирди. Элмурод Мирзаевнинг онасига гап ўргатиб Шуҳрат Садиновни ёмонлади. Беҳруз Жумақуловнинг отаси Шуҳрат Садиновнинг ўғилларидан пул оляпти, деб бизни фикримизни бузиб ташлади. Шундан сўнг Сайёра муаллимнинг айтганини қилиб, у айтган болаларнинг ҳаммасини судга қўшиб ташладик.
– Судга киришимдан аввал менга гап ўргатди. Сен судга борганингда биринчи судьядан ўзингни ҳимояга олишини сўрайсан деди. Мен бундай қилолмайман дедим. Агар ҳозир қилмасанг кейин интернатда сени тавсифномаларинг ва шаҳодотномаларингни қониқарсиз қилиб беради. Сен Бахтга (Бахт шаҳрида худди шундай вояга етмаган болалар коллежжи бор) кетиб қолишинг мумкин деб мени қўрқитди, — дейди Бобур Каримов. – Менга ҳамма гапларни Сайёра Мансурова ўргатган. Биз мактаб интернатидаги камера олдида гаплашиб турганимизда ҳам Шуҳрат Садиновга қарши кўрсатма беришимни айтган. Биринчи гуруҳ ҳам гувоҳ эди ўша пайтда гаплашаётганимизда. Ўшанда судда борганимда нима дейишим кераклигини айтаётган эди.
Бобур Каримовнинг маълум қилишича, Сайёра Мансурова давлат томонидан ҳимояга олинган вақтда Бобурнинг Болалар уйида қандай юргани, аҳволи ва соғлиғи қандай эканлигидан хабардор бўлиб юрган. Мансурова Болалар уйидаги ошхоначи қариндоши бўлишини айтган.
– Мендан қачон кетасан деб сўради. Яқинда кетаман дедим. Сен кетма, улар мени устимдан ёзмоқчи. Сен менга керак бўласан, деди. 9-синф ўқувчиларини йиғишим керак. Ўшалар билан биргалашиб менга ёрдам берасан, деди. Омонов Суҳробнинг гаплари ёлғон деб айтасан, деб гап ўргатди, — дейди Бобур Каримов. – Мен бошқа бунақа ишларга аралашмайман деб айтдим. Сайёра Мансурова Элмурод Мирзаевни телефон орқали расмга тушириб интернетга чиқарган. «Тихий час» пайти болалар ухлаб ётганда келиб, расмга тушириб кетарди.
Бир ой давомида давлат ҳимоясида турган Бобур Каримов бу вақт оралиғида ҳамма воқеликни атрофлича таҳлил қилиб, охири пушаймон бўлиб тўғрисини айтишга аҳд қилган.
– Шунча одамга туҳмат қилиб қўйдим. «Децкий приёмник»да ҳам бир ой ўзимга ўзим кўнглим хижил бўлди. Одамлар қарғайди, қарғиш уради, деб тўғрисини айтишга аҳд қилдим. Сайёра Мансурова билан энди гаплашмайман. Иложи бўлса интернатдан чиқиб ўқимоқчиман. Ниятим шу бошқа ҳеч кимни гапига кирмайман. Энг асосийси, адвокатга катта туҳмат қилиб қўйдим. Нимаики қилган бўлсам кечирим сўрайман. Бошқа бунақа иш қилмайман. Мен ҳаммасини судьяга айта оламан. Бу ҳаммаси Сайёра Мансурованинг буйруғи ва кўрсатмаси асосида амалга оширилган эди. Мени кечиришингизни сўрайман, — дейди Бобур Каримов.
Бобур Каримовнинг апелляция судида айтган ёлғон кўрсатмаси сабабли Шуҳрат Садиновнинг адвокатига жиноят иши очиш тўғрисида суд ҳукм чиқарган эди.
Изоҳ (0)