Ўзбекистонга Американинг Uncle Ben’s заводи вакиллари ташриф буюради

Жорий йилнинг апрель ойида Миссисипи губернатори савдо миссияси билан Ўзбекистонга ташриф буюриши режалаштирилмоқда, деб хабар берди Spot.

Хабарда айтилишича, Миссисипи штати губернатори Фил Брайнт 1992 йилда мамлакатлар ўртасидаги дипломатик алоқалар ўрнатилганидан бери Ўзбекистонга илк бор ташриф буюрган Америка штати раҳбари бўлади.

Брайннинг апрель ойида ташрифидан сўнг май ойида икки давлат раҳбарининг тарихий учрашуви бўлиб ўтади. Ўтган йилдаёқ АҚШ ва Ўзбекистон компаниялари ўртасида бир неча миллиард долларлик шартномалар имзоланган.

Қайд этилишича, губернатор «қуруқ қўл билан» келмайди. У Миссисипининг етакчи компаниялари раҳбарларидан иборат, жумладан, Американинг энг йирик озиқ-овқат маҳсулотлари ишлаб чиқарувчи компания — Uncle Ben’s заводи савдо делегациясига бошчилик қилиши режалаштирилмоқда.

Uncle Ben’s — тезпишар гуруч ва у билан боғлиқ озиқ-овқат маҳсулотлари бренди. Шунингдек, консерваланган соус, кетчуплар билан ҳам машҳур. Twix, Bounty, Orbit ва бошқа кўплаб маҳсулотлар ишлаб чиқарувчи Mars корпорациясига қарашли.