Савдо-саноат палатаси, Тошкент шаҳар ҳокимлиги, «Ўзбекистон почтаси» АЖ ва ZoodMall халқаро онлайн савдо майдончаси томонидан пойтахт туманлари ҳокимликларида ташкил этилган бизнес-учрашувларда 400 нафарга яқин тадбиркор иштирок этди.
Жорий йил 26 февралдан 1 мартгача тадбиркорларнинг онлайн савдо афзалликлари ва экспорт салоҳиятига оид саволларига Юнусобод,Учтепа, Чилонзор, Сирғали, Бектемир, Яшнобод ва Мирзо Улуғбек туманларида ўтказилган учрашувларда батафсил жавоблар берилди. Шунингдек, 4—5 март кунлари Олмазор, Шайхонтоҳур, Яккасарой ва Миробод тумани ҳокимликларида ҳам тошкентлик тадбиркорлар билан учрашувлар ўтказилиши режалаштирилган.
Ушбу тадбирларда кенг истеъмол товарларини ишлаб чиқарувчи маҳаллий тадбиркорлар, дистрибьюторлар, савдогарлар ҳамда бизнес муҳитининг бошқа иштирокчилари қатнашяпти. Уларда жаҳон бозорига чиқиш имконини берувчи онлайн-савдонинг замонавий канали тақдимоти ўтказилмоқда.
«Ўзбекистон ўтган йили 14,3 миллиард доллар миқдоридаги товар экспорт қилган, бу кўрсаткични электрон тижоратни фаол жадаллаштириш эвазига яхшилаш мумкин, — дея таъкидлади ZoodMall глобал бизнесни ривожлантириш бўйича бош директори Сардор Муҳаммедалиев. — Ҳокимликларда ўтказилиши режалаштирилган бизнес-учрашувларнинг асосий мақсади шундай майдончалар орқали савдонинг афзалликлари ҳақида сўзлаб бериш, тадбиркорларни қизиқтирган саволларга жавоб бериш ва маҳаллий бизнес рақобатбардошлигини оширувчи ва савдо ҳажмини кенгайтирувчи онлайн-савдога тадбиркорлар қизиқишини оширишдан иборат».
Товарларни ZoodMall онлайн майдончасига жойлаштириш бепул. Платформа 8 тилда хизмат кўрсатади: ўзбек, рус, инглиз, қозоқ, озарбайжон, форс, курд ва араб тилларида.
Изоҳ (0)