Savdo-sanoat palatasi, Toshkent shahar hokimligi, “O‘zbekiston pochtasi” AJ va ZoodMall xalqaro onlayn savdo maydonchasi tomonidan poytaxt tumanlari hokimliklarida tashkil etilgan biznes-uchrashuvlarda 400 nafarga yaqin tadbirkor ishtirok etdi.
Joriy yil 26-fevraldan 1-martgacha tadbirkorlarning onlayn savdo afzalliklari va eksport salohiyatiga oid savollariga Yunusobod,Uchtepa, Chilonzor, Sirg‘ali, Bektemir, Yashnobod va Mirzo Ulug‘bek tumanlarida o‘tkazilgan uchrashuvlarda batafsil javoblar berildi. Shuningdek, 4—5-mart kunlari Olmazor, Shayxontohur, Yakkasaroy va Mirobod tumani hokimliklarida ham toshkentlik tadbirkorlar bilan uchrashuvlar o‘tkazilishi rejalashtirilgan.
Ushbu tadbirlarda keng iste’mol tovarlarini ishlab chiqaruvchi mahalliy tadbirkorlar, distribyutorlar, savdogarlar hamda biznes muhitining boshqa ishtirokchilari qatnashyapti. Ularda jahon bozoriga chiqish imkonini beruvchi onlayn-savdoning zamonaviy kanali taqdimoti o‘tkazilmoqda.
“O‘zbekiston o‘tgan yili 14,3 milliard dollar miqdoridagi tovar eksport qilgan, bu ko‘rsatkichni elektron tijoratni faol jadallashtirish evaziga yaxshilash mumkin, — deya ta’kidladi ZoodMall global biznesni rivojlantirish bo‘yicha bosh direktori Sardor Muhammedaliyev. — Hokimliklarda o‘tkazilishi rejalashtirilgan biznes-uchrashuvlarning asosiy maqsadi shunday maydonchalar orqali savdoning afzalliklari haqida so‘zlab berish, tadbirkorlarni qiziqtirgan savollarga javob berish va mahalliy biznes raqobatbardoshligini oshiruvchi va savdo hajmini kengaytiruvchi onlayn-savdoga tadbirkorlar qiziqishini oshirishdan iborat”.
Tovarlarni ZoodMall onlayn-maydonchasiga joylashtirish bepul. Platforma 8 tilda xizmat ko‘rsatadi: o‘zbek, rus, ingliz, qozoq, ozarbayjon, fors, kurd va arab tillarida.
Izoh (0)