Тошкентнинг Юнусобод туманида жойлашган «Тет-а-тет» тунги клубида 24 февраль куни соат 23:30 атрофида муштлашув ва пичоқбозлик юз берган. Бу ҳақда Бош прокуратура матбуот хизмати маълум қилди.
Бош прокуратура ахборотида оғзаки келишмовчилик, муштлашув ва пичоқбозлик жараёнини изоҳлашда камида 11 кишининг исмлари келтирилган. Оғзаки келишмовчиликдан сўнг тунги клуб йўлагида муштлашув бошланган. Муштлашувга бошқалар ҳам аралашган.
Муштлашув давомида Д.А. исмли фуқаро «кучи етмаганлиги сабабли» чўнтагидан ошхона пичоғи чиқариб, дастлаб М.М.нинг орт томонидан чап курак қисмига уриб тан жароҳати етказган, Н.Н.нинг чап кўкрак соҳасини шу пичоқ билан кесиб юборган, сўнг А.Т.нинг қорин соҳасига пичоқ билан уриб, тан жароҳати етказган.
Ҳолат юзасидан Юнусобод туман ИИБ томонидан 25 февраль куни Д.А. ва унинг таниши Ж.Т.га нисбатан жиноят иши қўзғатилган. 26 февраль куни уларнинг ҳар иккиси эҳтиёт чораси сифатида қамоққа олинган. Ҳозирда жинояти иши бўйича дастлабки тергов ҳаракатлари давом эттирилмоқда
«Умумий ҳисобда 13 нафар бола бўлган. Жанжалда қатнашганларнинг 5 нафари ЖИДУ талабаси бўлиб, уларнинг 3 нафари пичоқдан зарар кўрган. Айбланувчиларнинг икки нафари ҳеч қаерда ишламайди, бир нафари муқаддам судланган. Жароҳатланган талабаларнинг икки нафарининг ҳолати ўртача баҳоланмоқда», — дейилади Бош прокуратура матбуот хизмати хабарида.
Эслатиб ўтамиз, 2018 йил августида Юнусободдаги бошқа бир тунги клубда юз берган муштлашув ва пичоқбозлик оқибатида спортчи Жамшид Кенжаев ҳалок бўлган эди. Ушбу воқеадан сўнг маъулм муддат тунги клублар фаолияти чеклаб қўйилди (Кенжаев ҳалок бўлган тунги клубнинг фаолияти умуман тўхтатилди), жамоатчилик томонидан эса Ўзбекистон ёшларига тунги клублар керак эмаслиги ҳақида фикрлар янгради.
Изоҳ (0)