Сирдарё вилоятида ўзгаларга тегишли 7 миллион сўм ва бошқа буюмларни талончилик йўли билан ўзлаштирган фуқаро қўлга олинди. Бу ҳақда вилоят ИИБ матбуот хизмати хабар берди.
17 февраль куни Сирдарё тумани ИИБга ариза билан Навоий МФЙда яшовчи Д.Н. (исми ва шарифлари ўзгартирилган) мурожаат қилиб, 2019 йил 17 февраль куни соат 04:00 ларда Сирдарё тумани Тадбиркор МФЙ ҳудудидан ўтган М-34 автойўлининг 96-километрида Термиз—Тошкент йўналишида йўл четида ўзига тегишли Damas русумли автомашинасида таниши А.Л. ҳамда укаси О.Т лар билан ухлаб ётган вақтида, номаълум шахслар автомашина чап орқа ён ойнасини асфальт бўлаги билан уриб синдириб, ўриндиқ устида турган таниши А.Л.га тегишли қора рангли сумкасини ичида бўлган 2 473 000 сўм пулларини, фуқаролик паспортини, 1 дона нархи 500 000 сўмлик қора рангли «Vertu» русумли уяли алоқа телефон аппаратини, яшаш уйининг 1 дона калитини ҳамда укаси О.Т га тегишли жигарранг сумкасини ичида бўлган 1 000 000 сўм пулларини, ҳисобида 3 000 000 сўм пули бўлган «Ипак йўли» банкининг пластик картасини ва 2 дона қарз дафтарларини очиқдан-очиқ талон-тарож қилишганликларини маълум қилган.
Сирдарё вилояти ИИБ ЖҚБ томонидан олиб борилган тезкор суриштирув ҳаракатлари давомида мазкур жиноятни У.Ф содир этганлиги аниқланиб, далилий ашё олинган. 2019 йил 17 февраль куни Сирдарё тумани ИИБ ТБ томонидан У.Ф га нисбатан ЖКнинг 166-моддаси (талончилик) 2-қисми «в» банди ва 227-м 2-қисми «а» банди билан жиноят иши қўзғатилган.
Ҳозирда тергов ҳаракатлари олиб борилмоқда.
Изоҳ (0)