Қашқадарё вилояти Чироқчи тумани Жиноят ишлари бўйича суди пора билан қўлга тушган ИИБ ходимига нисбатан ҳукм ўқилди. Бу ҳақда суд матбуот хизмати «Дарё» га хабар берди.
Жаббор Элдоров (исм-фамилияси ўзгартирилган) ИИБ хизматига яхши ниятлар билан ишга киради. Аҳоли тинчлигини сақлаш ва жиноятчиликка қарши курашиш асосий вазифаси ҳисоблангани ҳолда, ўзига бириктирилган ҳудудда профилактика инспектори вазифасида фаолият кўрсатиб келади. Бу давр мобайнида Президент ташаббуслари билан берилаётган имтиёзлар асосида автомашина ва хизмат уйи билан таъминланди, моддий томондан бирон-бир қийинчиликка дуч келмади. Бироқ, уни ким ва нима йўлдан урди-ю, ўз нафсининг қурбонига айланди.
Жумладан, Элдоров хизмат ҳудудида тун қоронғусида юрган ёш йигит ва қизларни учратиб қолиб, уларни хизмат хонасига олиб келади. Улар билан профилактик суҳбат ўтказиб жавоб бериб юборади, бироқ йигитлардан бири Насим Тоҳировдан моддий манфаатдор бўлиш фикри унинг тинчлигини бузди.
Эртаси куни, Насим Тоҳиров билан учрашиб, ҳужжатларини олиб келиш кераклигини айтади. Бу орада Насим Тоҳировдан нима қилиб бўлса ҳам пул олиш учун унинг опасига тегишли, бир неча кун илгари кечаси уни ушлаган кўп қаватли уй олдига бориб, уй чироғи ёниқ эканлигини кўриб, ушбу хонадонга кириб боради ва Насим Тоҳировнинг ўртоғи Мансур Оролов ижарада яшаб келаётганини аниқлайди ва унинг фуқаролик паспортини олиб қўяди. Ана энди ўз ниятини амалга ошириш учун қулай имконият ва вазиятга эга бўлади. Мансур Оролов орқали Насим Тоҳировни чақиртириб, унга опаси ва ўртоғига нисабатан Ўзбекистон Республикаси Маъмурий жавобгарлик тўғрисидаги кодекси 223-моддаси билан маъмурий баённома тузишини, катта миқдорда жарима қўлланилишини айтади. Ўз ўрнида Насим Тоҳировнинг «ёрдам бериш» ҳақидаги илтимоси унга қўл келди ва ниятини очиқ айтади: «Жаримани менга тўлайсан, 100 доллар олиб кел»
Насим Тоҳиров ИИБ ходимининг ҳаракатлари ноқонуний эканлигини сезиб, ҳуқуқни муҳофаза қилувчи органларга ариза билан мурожаат қилади ва тегишли тартибда тадбир ўтказилади.
Жаббор Элдоров пора олишдан аввал барча эҳтиёт чораларини кўришга ҳаракат қилган бўлса-да, бироқ, «бузоқнинг қочгани сомонхонагача» деганларидек, 100 АҚШ долларини маъмурий баённома тузмаслик эвазига олган вақтида ушланди.
Жаббор Элдоров ўз ҳалқи ва муқаддас бурчига хиёнат қилди, бир неча йиллик обру-эътибори ва давлат ишончини ўз нафси йўлида 100 АҚШ долларига алмаштириб юборди.
Жиноят ишлари бўйича Чироқчи туман судида (раислик қилувчи судья Ш.Бахтиёров) мазкур жиноят иши очиқ суд мажлисида кўриб чиқилди. Суднинг ҳукмига кўра, Жаббор Элдоров Ўзбекистон Республикаси Жиноят кодекси 210-моддаси 1-қисми (мансабдор шахс томонидан пора олиш) билан айбли топилиб, 2 йил муддатга мансабдорлик ва моддий жавобгарлик вазифаларида ҳамда ички ишлар идораларида ишлаш ҳуқуқидан маҳрум қилиниб, 2 йил 6 ой муддатга озодликдан маҳрум қилинди.
Шунингдек, жиноятнинг сабаблари ва унинг содир этилишига имкон берган шарт-шароитларни бартараф қилиш тўғрисида хусусий ажрим чиқарилиб, Қашқадарё вилоят ИИБ бошлиғи эътиборига ҳавола қилинди.
Изоҳ (0)