«Баҳорнинг биринчи кунини Наманганда кутиб олганимизда рамзий маъно бор — бу уйғонишимиз кераклигидан далолат». Бу ҳақда Президент Шавкат Мирзиёев Наманган шаҳар ҳокимлигида бўлиб ўтаётган вилоят фаоллари йиғилишида таъкидлади, дея хабар беради «Дарё» мухбири.
Шавкат Мирзиёев танқидий руҳда ўтаётган йиғилишда вилоят иқтисодиётида саноатнинг улуши атиги 17 фоизни ташкил этаётгани, айрим туманларда умуман саноат корхоналари йўқлигини қайд этди.
—Наманганда 27 йил мобайнида бирорта катта корхона қурмадик. Вилоятнинг имкониятларидан етарлича фойдаланмадик, — деди давлат раҳбари.
Шавкат Мирзиёевга кўра, вилоятда иш ўринлари етарли бўлмагани учун 200 минг наманганлик хорижда меҳнат қилмоқда, 100 мингдан ортиқ киши ишсиз. Уларни иш билан таъминлаш учун янги корхоналарни ишга тушириш, томорқа имкониятларидан тўлиқ фойдаланиш зарур.
Давлат раҳбари Наманганга ташрифи давомида дўконларни айлангани, уларда нархлар қимматлиги, четдан келтирилган маҳсулотлар кўплигига гувоҳ бўлганини билдирди.
Шавкат Мирзиёев Наманганда жиноятчиликни жиловлаш зарурлиги, бу борадаги кўрсаткичлар йил охирига қадар ижобий томонга ўзгариши кераклигини таъкидлади.
Йиғилиш давом этмоқда.
Изоҳ (0)