Мажбурий ижро бюроси Тошлоқ туман бўлими томонидан Тоғлиқ қишлоғи ҳудудида жойлашган кўп сонли аҳоли хонадонлари табиий газ тармоғига ноқонуний уланганлиги аниқланган. Мазкур ҳолат юзасидан далолатнома расмийлаштириш жараёнида туман газ таъминоти корхонаси ходими Ў.Х. қонунбузар шахсларга нисбатан чора кўрмаслик эвазига МИБ туман бўлими ходими А.Т.га 2000 доллар миқдорида пора таклиф қилган. Шу куннинг ўзида 500 доллар, эртасига яна 1500 доллар олиб келиб беришини айтган. Бу ҳақда «Дарё» мухбири хабар бермоқда.
25 февраль куни билдирги асосида МИБ вилоят бошқармаси ички хавфсизликни таъминлаш бўлими ва туман прокуратураси ходимлари томонидан ўтказилган тезкор тадбирда Ў.Х. МИБ ходими А.Т.га МИБ Тошлоқ туман бўлими биносида 300 АҚШ доллари ва 1,5 миллион сўм миқдоридаги пулларни пора тариқасида бераётган вақтида ашёвий далиллар билан ушланган.
Дастлабки терговга қадар текширишда Ў.Х. 2018 йил декабрь ойида Тоғлиқ кўчасида яшовчи 54 нафар фуқаронинг яшаш уйларини ҳеч қандай ҳужжатларсиз ноқонуний равишда газ тармоғига улаб берганлиги, бунинг эвазига ҳар бир хонадондан 100 минг сўмдан пул олганлиги, бироқ ҳеч қандай ҳужжат расмийлаштириб бермаганлиги аниқланди.
Ў.Х. 26 февраль куни ёзган «пушаймонлик аризаси»да аҳолидан йиғилган 5 миллион сўм миқдоридаги пулларни ўзининг шахсий эҳтиёжлари учун ишлатиб юборганлиги, ҳозирда қилган ишидан чин кўнгилдан пушаймон ва айбига тўлиқ иқрорлигини, қонун доирасида енгиллик беришликни сўраган.
27 февраль куни мазкур ҳолат юзасидан газ таъминоти корхонаси ходими Ў.Х.га нисбатан Жиноят Кодексининг 168-моддаси 1-қисми (фирибгарлик), 211-моддаси 1-қисми (пора бериш) билан жиноят иши қўзғатилган.
Ҳозирда Тошлоқ туман прокуратураси томонидан дастлабки тергов ҳаракатлари олиб борилмоқда.
Изоҳ (0)