Кеча, 21 февраль куни Бухорода ўтказилаётган Биринчи зиёрат туризмига 25 та давлатдан иштирокчилар келганини хабар берган эдик. Бугун шундай давлатлар сони 35 тага яқинлашди. Бу ҳақда Ўзбекистон туризмни ривожлантириш давлат қўмитаси матбуот хизматига таяниб, «Дарё» мухбири хабар бермоқда.
Форум доирасида халқаро мусулмон идоралари вакиллари билан ўтган конференцияда Бухоро 2020 йилда Ислом маданияти пойтахти деб эълон қилингани, сўнгги икки йилда туризм соҳасида амалга оширилган ўзгаришлар хусусида сўз борди.
«2018 йилда сайёҳлар сони 2,5 миллионга етди. Хорижий сайёҳлар сони эса 301 мингдан ортди. Истиқболда Бухорога сайёҳлар оқими кескин ортишини ҳисобга олиб, жорий йилда 60 га яқин меҳмонхоналар, 20 дан ортиқ ресторанлар, бир қатор истироҳат боғлари, сайлгоҳлар қурилмоқда. Бу борада Германия, Россия, Ҳиндистон, Хитой, Корея, Туркия каби мамлакатларнинг салоҳиятли инвесторлари билан ҳамкорлигимиз натижасида яқин орада Бухорога бир кунда 10 мингдан кўпроқ сайёҳни қабул қилиш бўйича меҳмонхона фондлари яратилади. Бундан ташқари, сайёҳлар учун Экотуризм, Гострономик туризм, Агротуризм, Спорт туризми каби янги туризм йўналишлари ўзлаштирилиб, анъанавий маданий-маърифий тадбирлар, фестиваль ва кўрик-танловлар ташкил этилиши йўлга қўйилмоқда», — деди конференцияда сўз олган Бухоро вилояти ҳокими Ўктам Барноев.
Конференцияда Бош вазир ўринбосари Азиз Абдуҳакимов, Ўзбекистон мусулмонлари идораси раиси, муфтий Усмонхон Алимов, Миср ижтимоий бирдамлик оилалар ва ногиронлар Вакиллари палатаси қўмитаси раиси, APE чўфилар орденлари Юқори Кенгаши раиси Абдулҳади ал-Касаби ва бошқалар Ўзбекистоннинг мусулмон оламидаги ўрни ва нуфузи, ислом маданиятини ривожлантириш истиқболлари, катта йўл бўйларида масжидлар сонини кўпайтириш, халқаро туризм салоҳиятини ривожлантириш кабилар хусусида сўз юритди.
Билдирилишича, Ўзбекистондан 7 мингдан ортиқ тарихий обидалар мавжуд бўлиб, 200 дан ортиғи ЮНЕСКО рўйхатида. Ислом маданияти обидаларини асраб-авайлаш ва тарихий обидаларга бой давлат сифатида Ўзбекистон 9-ўринни эгаллаб турибди.
Биринчи зиёрат форуми давом этмоқда.
Изоҳ (0)