2019 йил 19 февраль куни Косонсой тумани ИИБ жиноят қидирув бўлинмаси тезкор вакили Наманган вилоят ИИБ бошлиғи номига билдирги билан мурожаат қилди. Бу ҳақда «Дарё»га ИИБ матбуот хизмати маълум қилди.
Билдиргига кўра, шу куни олинган тезкор маълумотга асосан Косонсой туманида яшовчи, 1964 йилда туғилган фуқаро Б.А. бошқарувида бўлган «ВАЗ 2101» русумли автомобиль текшириб кўрилганда машина орқа ўриндиғи остидан кўкимтир рангли, ўткир ҳидли ўсимликлар сақлаб келинаётганлиги аниқланиб, текшириб кўришлик учун олинган.
Улар мутахассис томонидан холислар иштирокида кўздан кечирилган ва тортилганда 53 грамм миқдордаги марихуана гиёҳвандлик моддаси эканлиги маълум бўлган.
Шунга асосан Косонсой тумани ИИБ жиноят қидирув бўлинмаси тезкор вакили томонидан терговга қадар текширув ҳаракатлари олиб борилаётганда Б.А. унга ишни ижобий ҳал этиш учун 400 АҚШ доллари миқдорида пул таклиф этган.
Билдиргида келтирилган маълумотларни текшириш мақсадида ИИВ ЎХБ Наманган вилояти бўйича бўлими ва Косонсой туман прокуратураси масъул ходимлари билан ҳамкорликда тезкор тадбир ўтказилди.
Тадбир давомида фуқаро Б.А. Косонсой тумани ИИБ жиноят қидирув бўлинмаси тезкор вакили хизмат хонасида 400 АҚШ доллари миқдоридаги пулларни пора тариқасида берган вақтида тадбир иштирокчилари томонидан ашёвий далиллар билан қўлга олинди.
Ҳозирда мазкур ҳолат юзасидан Косонсой туман прокуратураси томонидан ЖКнинг 211-моддаси 1-қисми билан жиноят иши қўзғатилиб, тергов ҳаракатлари олиб борилмоқда.
Изоҳ (0)