Тошкент шаҳрида кунига икки минг, йилига 700 минг тонна, республика бўйича эса йилига 7—8 миллион тонна маиший чиқинди ҳосил бўлади, деб ёзади ЎзА.
Уларнинг бор йўғи 4—5 фоизигина қайта ишланмоқда. Дунёнинг йирик шаҳарларида эса бу кўрсаткич 15—20 фоизни ташкил этади.
«Шу боис, чиқиндиларни сараланган ҳолда топшириш тизимини йўлга қўйиш лозим. Бунда экологик лойиҳалар доирасидаги тарғибот тадбирлари ва амалий мулоқот келгусида ижобий самара бериши шубҳасиз», — деди Экология ва атроф-муҳитни муҳофаза қилиш давлат қўмитаси раиси ўринбосари Ўктам Ўтаев.
Унинг айтишича, 11—17 март кунлари Тошкент шаҳрида ўтказилиши режалаштирилаётган «Hashar week» лойиҳасини амалга оширишдан кўзланган мақсад ҳам аҳолининг кенг қатлами, шу жумладан, ҳукумат, нодавлат нотижорат ташкилотлари, хусусий корхоналарнинг эътиборини атроф-муҳитга эҳтиёткорона муносабатда бўлиш, хусусан чиқиндиларни бошқариш масаласида уларнинг хабардорлигини ошириш, чиқиндиларни саралаш маданиятини шакллантириш ҳисобланади.
Изоҳ (0)