4 февралдан бошлаб «Ўз роботингни ярат ва ноутбук ютиб ол» шиори остида ёшлар ўртасида ўтказилаётган «ROBO CODERS—2019» танлови ғолиблари совғасиз қолиши мумкин. Бу ҳақда Мирзо Улуғбек инновацион маркази матбуот хизмати хабар берди.
Танлов Мирзо Улуғбек инновацион маркази (Mirzo Ulugbek Innovation Center) томонидан ўтказилаётган бўлиб, унда 15 ёшдан 30 ёшгача бўлган барча ёшлар иштирок этмоқда. Бунинг учун мантиқий математик масалалар ечими учун кодлар ёзиш қобилиятига эга бўлиш талаб этилган.
Танловнинг биринчи босқичи 2019 йил 17 февралда ўтказилган бўлиб, унда иштирокчиларга робототехникага оид мантиқий ҳисоб-китоблар ва алгоритмларга оид топшириқлар берилган.
Иккинчи — якуний босқич эса 24 февраль куни Муҳаммад ал-Хоразмий номидаги Тошкент ахборот технологиялари университетида бўлиб ўтади.
Танлов шартига кўра, ғолиблар ноутбуклар ва бошқа турдаги қимматли совғалар билан тақдирланиши керак.
Бироқ Инновацион марказга боғлиқ бўлмаган ҳолда танловда иштирок этиш учун пойтахтга Хоразм, Наманган, Бухоро каби республиканинг турли бурчакларидан келган иштирокчилар совғасиз қолиш мумкин.
Гап шундаки, танлов Инновацион марказ ҳисобидан ўтказилмоқда. Аммо бир ой давомида Инновацион марказ ҳисоб рақами Давлат солиқ қўмитаси томонидан блоклаб қўйилган. Солиқ қўмитаси эса марказ фойдасига ҳеч қандай чоралар кўрмаяпти.
Изоҳ (0)