«Қари билганни пари билмас». А Сериянинг қаришни билмайдиган ҳужумчилари ҳақида

Футбол бўйича Италия А Серияси «қирчиллама» ёшдаги ҳужумчилар учун тўла мос келиши кўп йиллардан бери таъкидланиб келинади. Бу стереотип ёки аксинчалиги ҳақида юз фоиз аниқ фикр билдириб бўлмайди. Замонавий футболнинг асосий юлдузларидан бири Криштиану Роналду ҳам 33 ёшида А Серияга келишга қарор қилгани бежиз эмас. Ва ҳозир у Италия чемпионати тўпурари бўлиб турибди. Қуйида 33 ёшдан сўнг А Серияда голлар уришдан тўхтамаган футболчилар ҳақида сўзлашамиз:

Фабио Квальярелла

Бу мақоланинг дунёга келишига ҳам қайсидир маънода Фабио асосий сабабчи. Айни дамда 36 ёшга қадам қўйган Квальярелла жорий мавсум «Сампдория» сафида А Сериянинг 20 та ўйинида қатнашиб, 16 та гол урди ва тўпурарлар пойгасида Роналду ҳамда Запатага асосий рақобатчи бўлиб турибди. Фабио кетма-кет уч мавсумдан бери А Серияда 9 тадан кам гол урмаяпти. Биз мамлакат юқори дивизионида 2000 йилда дебют қилган футболчи ҳақида гапираётганимизни унутмаслигимиз керак. У голларни фақат пенальтидан ураётгани йўқ. Фабио жорий мавсумда бир эмас, икки голни товони билан киритишга эришди.

Антонио ди Натале

Антонио ди Натале қачондир ёш ёки қари ҳисобланмаган. У доимо шунчаки — Антонио ди Натале бўлган. У кексалик жараёни ҳақида эшитган, аммо бунга ўзи «деярли» бошдан кечирмаган. Антонио 30 ёшга тўлгандан сўнг А Серияда 150 та гол урди. Шунчаки дахшат! 35 ёшга тўлганда эса чемпионатнинг 33 та ўйинида 23 та гол урган. Кейинги икки йилда эса яна 31 та голни ўз ҳисобига ёзиб қўя олган. Ди Натале футбол билан гол урган ҳолда хайрлашган. У сўнгги голини пенальтидан ўзидан 14 ёш кичик бўлган Симеоне Коломби дарвозасига киритганди.

Роберто Баджо

1994 йилги Жаҳон чемпионатидаги омадсизликка қарамай Роберто Баджо 10 йил давомида футбол мухлисларини ўз голлари билан хурсанд қилишда даовм этди. У 2004 йил фаолиятини «Брешиа» сафида якунлади. У кетма-кет 8 та мавсумда 9 тадан кам гол урмаган. Унинг сўнгги голи А Серияда «Брешиа»га «Лацио» устидан ғалаба келтирганди. Ўшанда Баджо «атиги» 37 ёшда эди.

Мирослав Клозе

ЖЧ—2014 чемпиони «Лацио»га келганда 33 ёшни уриб қўйганди. Аммо италиялик мухлислар унинг ёшидан ҳеч ҳам хавотирга тушмади, аксинча, «Бавария» мухлислари бироз хафа бўлганди. Боиси, Клозе ЖЧ—2014 да 4 та гол уриб, мундиалларда энг кўп гол урган футболчилар рейтингининг юқорисига кўтарилганди. Мирослав Римга шунчалик тез мослашиб кетдики, у мухлисларни ёши ҳақида умуман ўйламасликка мажбур қила олди. Футболчи кетма-кет уч мавсумда 9 тадан кам гол урмади. 35 ёшга кирган ҳар қандай футболчи ҳам битта ўйинда бешта гол ура олмайди. Аммо Клозе «Лацио»да буни уддалай олган. У «Болонья» дарвозасига бешта гол уриб, пента-трик қайд этганди.

Алессандро дел Пьеро

Дел Пьеро ҳозир 44 ёшда. Аммо ҳозир ҳам А Серияда майдонга тушадиган бўлса, кўплан гол ура оладигандек… «Ювентус» афсонаси ўзининг 33 ёшини қаршилаган мавсумда 20 та гол урганди. Бир йил ўтиб эса мавсумни 21 та гол билан якунлаган. «Юве» сафида сўнгги голини урган афсона 37 ёшга кирганди. Шундан сўнг футболчи «Сидней», «Дели Дайнамос» каби клубларда ўйнади.

Дарио Убнер

Яна бир қаримас футболчилардан бири Дарио Убнер эди. Кўп йиллар давомида қуйи дивизионларда фаолият олиб борган Убнер А Сериянинг 2001/02 йилги мавсумида «Пьяченца» сафида чемпионат тўпурари бўлишга эришди. Ўшанда Дарио «эндигина» 35 ёшга кирганди. Бир йил олдин бўлса, 17 та голи билан «Брешиа»га кўмаклашиб юборганди. Кейинги мавсумда эса Убнер «Пьяченца»да 14 та гол уради, бироқ жамоа Б Серияга тушиб кетади.

Лука Тони

Убнернинг рекордини А Серияда 10 йилда ортиқ вақт мобайнида ҳеч ким янгилай олмади. ЖЧ—2006 чемпиони Лука Тони эса буни уддалай олди. У «Бавария»даги саргузаштларидан сўнг яна Италияга қайтади. Шундан сўнг бир неча жамоаларда тўп суради. Аммо энг кўп голни «Верона» сафида уради. Кетма-кет 2 мавсумда 20 тадан гол. 2015 йилда эса Тони А Серияда 22 та тўп киритганди. Ўша мавсум Мауро Икарди ҳам 22 та гол урганди. Тонининг сўнгги голларидан бири «Ювентус» жамоаси дарвозасидан жой қилган. У ўшанда 38 ёшда эди.

Франческо Тотти

«Император» 40 ёшга тўлгунга қадар «Рома»га содиқ қолди. Фаолияти сўнгида майдонда камдан кам кўриниш берган бўлса-да, уни Римда ҳам ундан ташқарида ҳам барча бирдек ҳурмат қиларди. 2012 йилда Тотти 36 ёшни қаршилаган вақтда А Серияда 12 та гол уришга муваффақ бўлганди.

FootballHD’дан Асрор Абдуназаров таржимаси