Африка тарихидаги энг бой 10 нафар футболчи ҳақида

Европада футбол ва унинг оммабоплиги африкалик кўплаб оч-наҳор болаларнинг бутун ҳаёт йўлини ўзгартириб юбора оладиган имкониятга айлангани айни ҳақиқат. Ўз вақтида камбағалликдан азият чеккан африкалик болалар айни дамда ватанида ҳам ундан ташқарида ҳам катта миллионерлардан ҳисобланади. Футболда бошланишига жуда кўп маблағ талаб этилмайди. Оёққа мос келадиган пойабзал ва тепишга ярайдиган битта тўп бўлса кифоя. Қолгани эса меҳнат, ижодкорлик ва фантазия билан битадиган ишлар. Барча африкалик футболчиларга ҳам миллионерлик насиб этавермайди. Аммо уларнинг ҳар бири мамлакати спорти учун муносиб ҳисса қўша олгани ҳам бор гап. Қуйида Африка футболи тарихида ўз ўрнига эга, моддий ҳаётда ҳам «йўқолиб» қолмаган 10 нафар футболчи ҳақида сўз юритамиз.

10. Салли Мунтари — 5 миллион доллар

Айни дамда 34 ёшни қаршилаган Салли Мунтарининг футболчилик фаолияти клубларга «бой» бўлди. Унинг биринчи профессионал клуби Италиянинг «Удинезе» бўлганди. Салли ажойиб ўйинлари орқали Удине жамоасида ўзи учун ёрқин келажакни кафолатлай олди. 2007 йилда Мунтари учун «Портсмут» клуби 10,5 миллион евро тўлашга қўрқмади. Аммо бу ганалик учун чегара бўлиб қолмади. Орадан бир йил ўтиб, «Интер» Мунтарини Италияга қайтариш учун 14 миллион евронинг баҳридан ўтди. Шундан сўнг унинг карьерасида чинакам «саёҳатлар» бошланди. Орада «Сандерленд», «Милан», «Ал-Иттиҳод», «Пескара» ва «Депортиво» каби клубларда фаолият олиб борди. 2018 йил апрелидан бери расмий ўйинларда иштирок этмаган футболчи қишки трансферлар вақтида Испаниянинг «Албасете» клуби билан шартнома имзолашнинг уддасидан чиқди. Таҳлилчилар баҳосига кўра, Салли ҳозирга қадар 5 миллион доллар миқдорида бойлик жамғаришга улгурган.

9. Кристофер Самба — 7 миллион доллар

Конго терма жамоасида тўп сурувчи Кристофер Самба Францияда туғилиб ўсган. Футболчилик фаолиятини ҳам фаранглар диёрида бошлаган. Аммо ўзини кўрсатиш ва танилиш имкониятини Англияда, аниқроғи, «Блекберн» клубида қўлга киритган. Кристофер вақтида АПЛнинг ўтиб бўлмас «девор» ҳимоячиларидан бири ҳисобаланарди. 2012 йил февралида Maxачқалъанинг «Анжи» клуби Самба учун инглиз клубига 14 миллион евро тўлади. Аммо орадан бир йил ўтиб, КПР (Куинз Парк Рейнжерс) жамоаси Кристоферни 1 миллион евро қимматроққа АПЛга қайтарди. Самба фаолияти давомида бирорта совринни қўлга кирита олмади. Унинг сўнгги клуби «Астон Вилла» эди. Самба клубни ёзда тарк этди. Шундан бери у клубсиз. У 34 ёшида эркин агент сифатида клуб излашда давом этмоқда. Самбанинг молиявий ҳолати айни дамда 7 миллион долларга баҳоланмоқда. У бу маблағларнинг асосий қисмини Россиядаги фаолияти орқали тўплашга эришган. Узун қулоқ гапларга кўра, унинг «Анжи»даги маоши ҳафтасига 150 минг доллар миқдорида бўлган.

8. Сейду Кейта — 10 миллион доллар

Келиб чиқиши Малидан бўлган Сейду Кейта тақдир тақозоси билан 17 ёшида «Марсель» академиясида пайдо бўлган. Футболчининг гуллаган даврлари эса «Ланс» ҳамда «Барселона»да ўтди. 2008 йилда Каталония клуби Кейта учун «Севилья»га 14 миллион евро тўлайди. Сейду бу маблағларни тўлиқлигича оқлаган. Унинг «Барселона»даги статистикасига бир қаранг: 188 та ўйин, 22 та гол. Фаолиятининг сўнгида (унгача Хитой, Испания ва Италия клубларида ҳам ўйнади)Кейта нефть ва пул оқиб турадиган Қатарга боришга қарор қилди. У ерда Сейду «Ал-Жаиш» шарафини ҳимоя қилиб, нафақага чиқишдан олдин етарличга маблағ жамғаришнинг уддасидан чиқди. 1,5 йилдан бери футбол ўйнамаётган Кейтанинг молиявий ҳолати 10 миллион долларга баҳоланган. Бу эса унинг Африканинг «бойвачча» футболчилардан иборат топ-10 лигига киришга заррача тўсқинлик қилаётгани йўқ.

7. Асамоа Гьян — 23 миллион доллар

Аккрада (Гана пойтахти) туғилган Асамо Гьян юқорида тилган олинган Салли Мунтари сингари жуда эрта «Удинезе»да пайдо бўлган. У 2008 йилда Удинедан 8 миллион евро эвазига «Ренн»га йўл олади. Орадан 2 йил ўтиб Асамоа Франциядан 2 баравар қиммат маблағ эвазига «Сандерленд»га ўтади. Аммо у Европадаги фаолияти давомида катта ютуқларга эриша олмади. Аммо БААга йўл олган ганалик футбол юлдузи «Ал-Айн» билан 3 марта мамлакат чемпиони бўлишга эришди. Орада эса юлдуз футболчилар учун жаннатмакон юртга айланган Хитойда ҳам тўп суришга эришди. У «Шанхай СИПГ»да фаолияти орқали етарлича маблағ жамғаришга эришди. 33 ёшли Гьян айни дамда «Қайсериспор»да фаолият олиб бормоқда. Футболчининг бойлиги эса 23 миллион долларга баҳоланмоқда. Бу маблағ нафақат унга, балки фарзандларининг ҳам жуда яхши яшашига етишига шубҳа йўқ.

6. Жон Оби Микел — 30 миллион доллар

Нигерия футболи тарихидаги энг омадли футболчилардан бири — Жон Оби Микелдир. У фаолиятининг энг яхши йилларини Лондоннинг «Челси» клубида ўтказди. Жон «аристократлар» билан бирга 2 бора Англия чемпиони бўлди. 4 марта Англия Кубоги, 1 бор эса Чемпионлар Лигаси ғолиблигини қўлга киритди. 2017 йил январида бўлса, Жон ҳам «соққа қилиш» учун Хитойга йўл олди. 2 йил вақтини «Тяньцзинь Теда» клубида ўтказди. Етарлича жамғарга эга бўлган 31 ёшли Микел қишки трансферлар вақтида Англияга қайтиб, «Мидлсборо» билан шартнома имзолади. Маълум бўлишича, нигериялик футболчи Хитойда ҳафтасига 200 минг евро маош олган. Бу эса унинг бу рўйхатга бежиз кирмаганлигига асосий сабаб. Унинг бойлиги 30 миллион долларга баҳоланган.

5. Майкл Эссиeн — 35 миллион доллар

Кўплаб африкалик футболчилар сингари Майкл Эссиeн ҳам фаолиятини Францияда бошлаган. Кейин эса «Челси»нинг топқир скаутлари Майклни пайқаб қолган вақтдаёқ, Лондонга олиб келишади. «Челси» Эссиeн учун 2005 йил ёзида «Лион»га 38 миллион еврони қуртдек санаб беради. Майкл бу пулларни ўзининг ажойиб ўйинлари ва узоқдан урган голлари орқали тўла оқлаб берди. Фаолияти давомида Майкл яна икки топ-клуб —  «Реал» ва «Милан»да ҳам ўйнади. Бундан ташқари тақдир уни ҳаттоки Индонезия чемпионатига олиб борди. У «Персиб Бандунг» клубида 1 йил мобайнида тўп сурди. Айни дамда 36 ёшли ганалик футболчи бирорта клуб аъзоси эмас. Катта эҳтимол билан у фаолиятини якунлайди. Бунга унинг молиявий ҳолати ҳам имкон беради. Майклнинг бойлиги 35 миллион еврога тенглиги айтилмоқда.

4. Эммануэль Адебайор — 45 миллион доллар

Того терма жамоаси тарихидаги энг яхши тўпурарнинг бойлиги 45 миллион долларга баҳоланган. Адебаёр ҳамон бойлигини ошириш билан банд. У ҳозир 34 ёшда, аммо шунга қарамай Туркиянинг «Башакшеҳир» клубида тўп суришда давом этмоқда. Эммануэль ҳам не ажабки, профессионал фаолиятини Францияда бошлаган. Ўзининг ажойиб ўйинлари сабаб АПЛга кўчиб этади. Туманли Альбионда эса «Арсенал», «Манчестер Сити», «Тоттенҳэм» ҳамда «Кристал Пэлас» клубларида фаолият олиб борди. Орада эса «Реал Мадрид»да ҳам тўп суриб кўрди. У ўз жамғармасининг асосий қисмини «Манчестер Сити»даги фаолияти орқали тўплаган. Адебайор «шаҳарликлар» сафида ҳафтасига 270 минг доллар ишлаб топган.

3. Яя Туре — 70 миллион доллар

Фаолиятини Бельгияда бошлаган Яя Туре у ерда Украинанинг «Металлург» клубига йўл олган. Кейин эса 2007 йилда «Барселона» аъзосига айланган. 2010 йил ёзида бўлса, 30 миллион евро эвазига «Манчестер Сити»га ўтган. Айнан «шаҳарликлар» сафида Яя Туре ҳар тарафдан муваффақиятга эришди. У орада 4 бор Африка қитъасининг энг яхши футболчи сифатида эътироф этилди. 35 ёшга кирган Туре ҳамон фаолиятини якунлагани йўқ. Бироқ 2018 йил декабрида «Олимпиакос» билан шартномасини бекор қилгач клубсиз юрибди. Яя фаолияти давомида жуда кўп пул ишлаб топди. Аммо таҳлилчилар унинг бойлигини айни чоғда «атиги» 70 миллион долларга тенг деб баҳоламоқда. Маълумотларга кўра, «Сити»даги саккиз йиллик фаолияти давомида Туре ҳафтасига 230 минг доллар маош олган.

2. Дидье Дрогба — 90 миллион доллар

Африка қитъасининг энг машҳур футболчиларидан бири Дидье Дрогба Лондоннинг «Челси» клубида ҳақиқий афсонага айланди. У 2004 йилда «Марсель»дан Лондон клубига 38,5 миллион евро эвазига кўчиб ўтади. «Аристократлар» сафида 381 та ўйин ўтказиб, 164 та гол уриб, клуб тарихидан муносиб ўрин олди. Дрогба Африка қитъасининг 2 марта энг яхши ўйинчиси сифатида эътироф этилган. 4 марта Англия чемпионатининг олтин медалларини қўлга киритди. Шу билан бирга 1 бор Чемпионлар Лигасида ғолиб бўлди. Норасмий маълумотларга кўра, Дрогба «Челси»да ҳафтасига 120 минг доллар маош олган. Дидье 2012 йилда кўплаб қитъадошлари каби Хитойга йўл олади. У ерда «Шанхай Шэньхуа» шарафини ҳимоя қилиш орқали ҳафтасига 250 минг доллар топади. У фаолиятини ўтган йили Канаданинг «Финикс Райзинг» клубида якунлади. Дрогба мазкур клубнинг акциядорларидан бири ҳисобланади. Футболчининг фаолияти давомида тўплган капитали 90 миллион долларни ташкил қилади.

1. Самуэль Это’O — 95 миллион доллар

Рейтингнинг юқорисидан эса Камерун терма жамоасининг собиқ футболчиси Самуэль Это’O ўрин олган. У фаолияти давомида қитъанинг 4 марта энг яхши футболчиси деб топилган. Европадаги фаолияти давомида «Реал», «Барселона», «Интер» ва «Челси» каби клубларда тўп сурди. Маълум бўлишича, футболчи Maxачқалъанинг «Анжи» клубида йилигида 25 миллион доллар маош олган. Айни дамда 37 ёшли камерунлик «Қатар» клубида фаолият олиб бормоқда. Это’Oнинг бойлиги 95 миллион долларга баҳоланган.

FootballHD’дан Асрор Абдуназаров таржимаси