Хитойда янги аэропорт қурилиш ишлари олиб борилмоқда. Қурилиш ишлари якунига етгач у дунёда энг йирик аэропортга айланади, деб ёзади TravelAsk.
Пекин шаҳрида қурилаётган халқаро аэропорт йўловчилар ташиш салоҳиятига кўра дунёдаги барча аэропортларни ортда қолдиради. Унда йилига 100 миллионгача йўловчи ташиш кўзда тутилган. Бинони жорий йилнинг куз ойидаёқ қисман фойдаланишга топшириш режалаштирилган бўлиб, қурилиш ишлари бутунлай якунланиши 2022 йилга мўлжалланган.
Пекин Дасин аэропорти пойтахт ҳудудидаги барча транспорт оқими кесишадиган жой бўлиб, бу саёҳатчилар учун имкон қадар қулайлик яратади. Бироқ Пекин чеккасида яна бир аэропорт қурилишига пойтахтнинг амалдаги аэропорти йўловчилар оқими ошганлиги сабабли ўз ишини уддалай олмаётгани сабаб бўлган.
Бу ерда ҳаво линиясидан ташқари 700 минг квадрат метр майдонда юқори тезликдаги поезд ва автомагистрал йўллари кесишмалари ҳам бўлади. Терминал майдони катталиги дунё бўйича рекорд даражада бўлиб, аэропортнинг ўзи эса 50 квадрат метрни эгаллайди. Бундай йирик лойиҳа учун уйлари аэропорт қурилиши ҳудудига тўғри келган 20 мингга яқин аҳолини кўчиришга тўғри келган.
Янги қурилаётган аэропорт нафақат ўзининг инфраструктура имкониятлари билан, балки оригинал архитектура тузилиши билан ҳам қизиқ. Лойиҳа муаллифи бутун дунё бўйича қурилган ноёб, ностандарт бинолари билан машҳур бўлган Захи Хадид архитектура бюроси ҳисобланади.
Аэропорт биноси юлдуз шаклида бўлиб, унинг ҳар бир бурчагида ўзига хос ички дизайнга эга ҳудуд бўлади. Улар Хитой боғи кўринишида, миллий анъаналарга мос равишда безатилади. Шунингдек, электр энергиясини тежаш мақсадида бинода табиий ёритиш ва вентиляция имкониятларидан юқори даражада фойдаланилган.
Изоҳ (0)