Ислом Каримов номидаги Тошкент халқаро аэропорти сайёҳларга хизмат кўрсатиш учун замонавий сайёҳлик ахборот марказини ишга туширади, дея хабар беради «UzDaily».
Тошкент халқаро аэропортида сайёҳларга хизмат кўрсатиш учун замонавий ахборот масканларини ташкил этиш ишлари бошланди.
«Tourist service center» 2-қўниш залида жойлашган ва ҳар бири хорижий сайёҳларга Ўзбекистоннинг туризм саноати, мамлакатнинг замонавий йўналишлари ҳақида маълумот берувчи 6 бўлинмали думалоқ дизайнга эга бўлади.
Бу ерда ҳар бир чет эллик фуқаро сайёҳлик сим-карталари, Ўзбекистон шаҳарлари бўйлаб қўлланма, замонавий дам олиш масканлари, меҳмонхоналар ва ресторанлар ҳақида керакли маълумотларни берувчи реклама брошюралари, шунингдек, Республикада бўлиш тартиблари ҳақида маслаҳат олиш имконига эга бўлади.
Айни дамда Туризмни ривожлантириш давлат қўмитаси томонидан Ўзбекистоннинг туристик салоҳияти тўғрисида 95 мингга яқин флаерлар тайёрланган.
Аввалроқ, Давлат қўмитаси маданий меърос объектлари, темир йўл вокзаллари, аэропортлар ва меҳмонхоналар ҳудудида сим-карталар, маданий-оммавий тадбирларга чипталар, қисқа муддатли турлар, темир йўл ва авиачипталар сотиладиган сайёҳлик ахборот марказларини ташкил этиш режалаштирилган эди.
Келгусида сайёҳларга умумий овқатланиш шаҳобчалари, турар-жой масканлари ҳақида маълумотлар, такси чақириш, музейга чипта олиш, совғалар харид қилиш имконини берувчи сим-карталар тақдим этадиган стационар ва мобил инфокиосклар ўрнатиш кўзда тутилган.
Лойиҳа давлат-хусусий шерикчилиги доирасида амалга оширилади.
Изоҳ (0)