Xitoyda yangi aeroport qurilish ishlari olib borilmoqda. Qurilish ishlari yakuniga yetgach u dunyoda eng yirik aeroportga aylanadi, deb yozadi TravelAsk.
Pekin shahrida qurilayotgan xalqaro aeroport yo‘lovchilar tashish salohiyatiga ko‘ra dunyodagi barcha aeroportlarni ortda qoldiradi. Unda yiliga 100 milliongacha yo‘lovchi tashish ko‘zda tutilgan. Binoni joriy yilning kuz oyidayoq qisman foydalanishga topshirish rejalashtirilgan bo‘lib, qurilish ishlari butunlay yakunlanishi 2022-yilga mo‘ljallangan.
Pekin Dasin aeroporti poytaxt hududidagi barcha transport oqimi kesishadigan joy bo‘lib, bu sayohatchilar uchun imkon qadar qulaylik yaratadi. Biroq Pekin chekkasida yana bir aeroport qurilishiga poytaxtning amaldagi aeroporti yo‘lovchilar oqimi oshganligi sababli o‘z ishini uddalay olmayotgani sabab bo‘lgan.
Bu yerda havo liniyasidan tashqari 700 ming kvadrat metr maydonda yuqori tezlikdagi poyezd va avtomagistral yo‘llari kesishmalari ham bo‘ladi. Terminal maydoni kattaligi dunyo bo‘yicha rekord darajada bo‘lib, aeroportning o‘zi esa 50 kvadrat metrni egallaydi. Bunday yirik loyiha uchun uylari aeroport qurilishi hududiga to‘g‘ri kelgan 20 mingga yaqin aholini ko‘chirishga to‘g‘ri kelgan.
Yangi qurilayotgan aeroport nafaqat o‘zining infrastruktura imkoniyatlari bilan, balki original arxitektura tuzilishi bilan ham qiziq. Loyiha muallifi butun dunyo bo‘yicha qurilgan noyob, nostandart binolari bilan mashhur bo‘lgan Zaxi Xadid arxitektura byurosi hisoblanadi.
Aeroport binosi yulduz shaklida bo‘lib, uning har bir burchagida o‘ziga xos ichki dizaynga ega hudud bo‘ladi. Ular Xitoy bog‘i ko‘rinishida, milliy an’analarga mos ravishda bezatiladi. Shuningdek, elektr energiyasini tejash maqsadida binoda tabiiy yoritish va ventilyatsiya imkoniyatlaridan yuqori darajada foydalanilgan.
Izoh (0)