Мексикада 70 га яқин одамлар кўмилган сирли мозор топилди

13 февраль куни Мексиканинг Колима штатидаги Текоман муниципалитетида яширинча кўмилган 69 та тана қолдиқлари топилди, ҳозирда уларни генетик идентификациялаш амалга оширилмоқда. Бу ҳақда «Корреспондент.net» хабар берди.

Дастлабки маълумотларга кўра, улар бундан беш йил аввал дафн этилган бўлиши мумкин.

Халқаро статистика институти маълумотларига кўра, 2017 йил якунларига кўра, Колима штати қотилликлар сонига кўра Мексикада энг нохуш штат деб топилган.

Бу ерда 100 минг аҳоли сонига 113 та қотиллиқ тўғри келади.

2018 йилда бу кўрсаткич 100 минг аҳолига 87 тани ташкил этган.

Расмий маълумотларга кўра, Лотин Америкаси давлатида 33 минг атрофида одам ўлдирилган. Бу 2017 йил кўрсаткичларига қараганда 15,5 фоизга кўп. Яна 40 мингга яқин одам бедарак йўқолган.

Аввалроқ Мексика пойтахтидан жанубда жойлашган Тлалпан ҳудудида олиб борилган археологик қазишмалар натижасида спирал кўринишида жойлаштирилган 10 нафар одам суяклари топилган.

2016 йилда эса Мексиканинг Коауила штатида 600 нафар одам яширинча кўмилгани аниқланган.