Самарқандлик тадбиркор ўз маблағи ҳисобидан боғча қуради

Савдо-саноат палатаси Самарқанд вилоят ҳудудий бошқармасида Самарқанд вилояти ҳокими Э.Турдимов тадбиркорларнинг фаолиятига тўсиқ бўлаётган муаммолар юзасидан мурожаатларини эшитди, деб ёзади «Zarnews».

Бу галги учрашувда ўндан ортиқ тадбиркор ер майдони ажратиш, хусусий мактабгача таълим муассасаси, меҳмонхона қуриш, тиббий марказ ташкил этиш каби масалаларда мурожаат қилди.

Жумладан, Самарқанд тумани Пулимуғоб маҳалласида яшовчи Азамат Мажидов шу маҳаллада хусусий мактабгача таълим муассасасини қуриш учун ер майдони ажратишда ёрдам сўради.

«Маҳалламизда мактабгача таълим муассасаси йўқ, — дейди А.Мажидов. — Ўз маблағим ҳисобидан ҳудудда боғча қуришни мақсад қилганман. Аммо қурилиш учун бўш жой топилмади. Фақатгина туман халқ таълими бўлими ҳудудида шундай жой бор экан. Ушбу масалада туман ҳокимлигига мурожаат қилганимда улар ер майдони халқ таълими бўлимига қарашли бўлганлиги сабабли қарор чиқариб беролмаслигини билдирди. Вилоят ҳокимининг қабулида шу масала бўйича мурожаат қилдим ва муаммом ижобий ҳал этиладиган бўлди».

Учрашувда тадбиркорлар мурожаати жойида ҳал этилди. Муаммоли масалаларга ечим топиш борасида мутасаддиларга вазифалар берилди.