Тадқиқотчилар йиртқич ҳайвонлар ҳаётини кузатиш ва турли вазиятларни суратга олиш мақсадида дронлардан тобора кўпроқ фойдаланмоқда, деб ёзади TravelAsk.
Янги технология ёрдамида Гавайидаги олимлардан бири сенсацион ва қимматли видеолавҳа олишга эришди. Гавайи университети денгиз ҳайвонларини тадқиқ этиш дастури раҳбари Ларс Бейдер дронлар ёрдамида букри китларни суратга олаётган вақтда маҳаллий туроператор сувда ноодатий нарсага кўзи тушиб, Бейдердан уни суратга олишни сўрайди.
«Биз фақат тоза сувни ва унда нимадир кучли тўлқинланаётганини кўрдик, бироқ унинг нима эканини била олмадик. Бирдан сувда кўп миқдорда қон пайдо бўлиб бизни ўша жойга яқинлашишга мажбур қилди. Шунда янги туғилган кит боласига кўзимиз тушди», — дейди тадқиқотчи.
Дрон ёрдамида у кит боласи ҳаётининг дастлабки дамларини видеотасвирга туширишга муваффақ бўлган.
Олимлар она китнинг танасидан ҳали ҳам чиқаётган қон ва янги туғилган китнинг орқа ва дум сузгичлари ўзига хос қайишқоқлигига асосланиб, кит улар келишидан атиги 20 дақиқа аввал туғилган деб тахмин қилмоқда.
Изоҳ (0)