Обаманинг собиқ ошпази лотереяда пул ютиб, уйсизлар учун ресторан очишга қарор қилди

Сальвадорлик ошпаз Роберто Мендос лотереяда 250 минг доллар ютиб олди, деб ёзади Forum Daily.

Роберто Мендос собиқ президентлар Барак Обама, Билл Клинтон, Жорж Буш ва халқаро қироллик оиласи аъзолари учун овқат тайёрлаган. Яқин вақтларгача у ҳатто Дональд Трамп учун ҳам овқат пиширарди.

Лос-Анжелесдаги The Beverly Hills меҳмонхонасида ишлаган пайтда «Оскар» мукофотини топшириш маросимида иштирок этган ва юлдузлар иштирокида ўтиришлар ташкиллаштирган.

Шимолий Каролина штатидаги Шарлоттга келгач, Мендос бош ошпаз сифатида ўз фаолиятини давом эттирган. Бир мунча вақт ўзи очган ресторанга раҳбарлик қилган, ҳозир эса Sysco Foods Service’да ишлайди.

Кўплаб мукофотларни қўлга киритганига қарамай, Мендос аввал ҳеч қачон лотереяда ютмаганини, лотереялар ишқибози эмаслигини айтган.

Шунга қарамай, маҳаллий 7-Eleven’га бориб лотерея сотиб олган ва унда 250 минг доллар ютуқ чиққан.

Мендос бу пулларни уйи йўқ одамлар учун ресторан очишга сарфлашни режалаштирмоқда.