5 февралнинг эътиборга молик янгиликлари — «Дарё» дайжестида.
GM Uzbekistan автомобиль заводи номи ўзгаради.
«Тез орада GM Uzbekistan номи ўзгаради. Ҳозирда бу бўйича иш олиб бормоқдамиз. Ҳамма масала ҳал бўлгач, бу ҳақда хабар берамиз», — деди «Ўзавтосаноат» АЖ раиси ўринбосари Азиз Шукуров.
Бундан ташқари, Азиз Шукуров ижтимоий тармоқларда Франциянинг Peugeot Citroen компанияси Ўзбекистонга киритган сармоясини қайтариб олишига кўзи етмагани учун, Жиззахдаги Uzbekistan Peugeot Citroen Automotive заводи қурилиши тўхтаб қолгани ҳақида тарқалган гап-сўзларга изоҳ берди.
Шунингдек, GM Uzbekistan Афғонистонга автомобиль экспорт қила бошлайди.
***
Тиббий эксперт Жамшид Кенжаевнинг қийналиб ўлганлигини маълум қилди.
Тошкент шаҳар судида Жамшид Кенжаев иши бўйича суд мажлисида воқеа жараёнида давлат суд эксперти Шуҳрат Ражабов ва клиник ординатор, тез ёрдам шифокори Рўзиқул Шербўтаев гувоҳ сифатида тингланган.
Суд экспертига суд мажлисида саволлар бериб ўтилган. Марҳум қийналиб ўлган ёки ўлмагани борасидаги фикри сўралганида, «қийналиб ўлган» дея жавоб берди.
***
Журналистлар Instagram’да «лайк»лар бўйича рекорд ўрнатган тухумни ким ўйлаб чиққанлигини аниқлади.
Товуқ тухумининг ўта машҳур аккаунтини Тhе & Partnership Лондон реклама агентлигининг 29 ёшли ходими Крис Годфри ва унинг икки дўсти ўйлаб чиққанлиги маълум бўлди.
Реклама саноати вакиллари аллақачон 10 миллион обуначига эга бўлган World Record Egg аккаунти яратувчиларига жуда кўп маблағ келтириши мумкин деб ҳисобламоқда.
***
Ўзбекистонда ҳарбий хизматчилар учун янги формали кийимларнинг дастлабки намуналари тайёрланди.
Ушбу кийимлар Мудофаа вазирлиги, Ҳарбий прокуратура, Президент хавфсизлик хизмати, Божхона қўмитаси, Давлат хавфсизлик хизмати, ДХХ Давлат чегараларини ҳимоя қилиш қўмитаси ҳарбий хизматчилари ва ходимлари учун мўлжалланган.
Бундай кенг кўламли ва масъулиятли вазифани бажариш учун малакали дизайнерлар, психологлар, кийим конструкторлари, технологлар, олимлар ва ушбу йўналишда тажрибага эга бўлган ҳарбийлар жалб этилди.
***
Ўзбекистонда ҳукумат томонидан баъзи тайинловлар амалга оширилди.
Ҳуснутдин Ҳасилов «Ўзбекистон темир йўллари» АЖ бошқаруви раиси вазифасини бажарувчи этиб тайинланди.
Одил Темиров «Ўзкимёсаноат» АЖ бошқаруви раиси этиб тасдиқланди.
Изоҳ (0)