5-fevralning e’tiborga molik yangiliklari — “Daryo” dayjestida.
GM Uzbekistan avtomobil zavodi nomi o‘zgaradi.
“Tez orada GM Uzbekistan nomi o‘zgaradi. Hozirda bu bo‘yicha ish olib bormoqdamiz. Hamma masala hal bo‘lgach, bu haqda xabar beramiz”, — dedi “O‘zavtosanoat” AJ raisi o‘rinbosari Aziz Shukurov.
Bundan tashqari, Aziz Shukurov ijtimoiy tarmoqlarda Fransiyaning Peugeot Citroen kompaniyasi O‘zbekistonga kiritgan sarmoyasini qaytarib olishiga ko‘zi yetmagani uchun, Jizzaxdagi Uzbekistan Peugeot Citroen Automotive zavodi qurilishi to‘xtab qolgani haqida tarqalgan gap-so‘zlarga izoh berdi.
Shuningdek, GM Uzbekistan Afg‘onistonga avtomobil eksport qila boshlaydi.
***
Tibbiy ekspert Jamshid Kenjayevning qiynalib o‘lganligini ma’lum qildi.
Toshkent shahar sudida Jamshid Kenjayev ishi bo‘yicha sud majlisida voqea jarayonida davlat sud eksperti Shuhrat Rajabov va klinik ordinator, tez yordam shifokori Ro‘ziqul Sherbo‘tayev guvoh sifatida tinglangan.
Sud ekspertiga sud majlisida savollar berib o‘tilgan. Marhum qiynalib o‘lgan yoki o‘lmagani borasidagi fikri so‘ralganida, “qiynalib o‘lgan” deya javob berdi.
***
Jurnalistlar Instagram’da “layk”lar bo‘yicha rekord o‘rnatgan tuxumni kim o‘ylab chiqqanligini aniqladi.
Tovuq tuxumining o‘ta mashhur akkauntini The & Partnership London reklama agentligining 29 yoshli xodimi Kris Godfri va uning ikki do‘sti o‘ylab chiqqanligi ma’lum bo‘ldi.
Reklama sanoati vakillari allaqachon 10 million obunachiga ega bo‘lgan World Record Egg akkaunti yaratuvchilariga juda ko‘p mablag‘ keltirishi mumkin deb hisoblamoqda.
***
O‘zbekistonda harbiy xizmatchilar uchun yangi formali kiyimlarning dastlabki namunalari tayyorlandi.
Ushbu kiyimlar Mudofaa vazirligi, Harbiy prokuratura, Prezident xavfsizlik xizmati, Bojxona qo‘mitasi, Davlat xavfsizlik xizmati, DXX Davlat chegaralarini himoya qilish qo‘mitasi harbiy xizmatchilari va xodimlari uchun mo‘ljallangan.
Bunday keng ko‘lamli va mas’uliyatli vazifani bajarish uchun malakali dizaynerlar, psixologlar, kiyim konstruktorlari, texnologlar, olimlar va ushbu yo‘nalishda tajribaga ega bo‘lgan harbiylar jalb etildi.
***
O‘zbekistonda hukumat tomonidan ba’zi tayinlovlar amalga oshirildi.
Husnutdin Hasilov “O‘zbekiston temir yo‘llari” AJ boshqaruvi raisi vazifasini bajaruvchi etib tayinlandi.
Odil Temirov “O‘zkimyosanoat” AJ boshqaruvi raisi etib tasdiqlandi.
Izoh (0)