Эксперт: Иқлим ўзгаришларига Ўзбекистон қишлоқ хўжалиги мослашиши керак

Ўзбекистон Республикаси Президенти ҳузуридаги Давлат бошқаруви академиясида «Ўзбекистон-2035» иккинчи халқаро форуми ўтказилмоқда. Бу ҳақда ЎзА хабар бермоқда.

Форумнинг «Экология, илм-фан, технология ва инновациялар» масалаларига бағишланган шўъба йиғилишида Ўзбекистоннинг узоқ муддатли Ривожланиш стратегияси концепцияси лойиҳасининг атроф-муҳитга бағишлаган тавсия ва таклифлари муҳокама қилинмоқда.

Қайд этилганидек, мамлакатда яқин йилларда аҳоли, иқтисодиётнинг ўсиши ва иқлим ўзгариши асосий табиий ресурсларга бўлган босимни оширади. Жумладан, сув, озиқ-овқат, экин майдонлари ва энергияга бўлган талаб ошиб боради.

Шундай экан, кутилаётган вазиятда Ўзбекистон иқлим ўзгаришига қандай мослашиши керак?

Бу саволга «Буюк Келажак» экспертлар кенгаши аъзоси, Кембриж университети (Буюк Британия) лабораторияси менежери Темур Юнусовнинг жавоб беришича, иссиқхона газларининг ортиши, ўртача йиллик ҳарорат кўтарилиши, шунингдек унумдор тупроқларда чўлланиш жараёнлари ва бошқа иқлим ўзгаришлари Ўзбекистон олдига аввало қишлоқ хўжалиги соҳасини тубдан ўзгартириш талабини қўяди.

— Деҳқон бўлиш учун олий маълумот шарт эмас деган тушунчалар эскирди, – деди Т.Юнусов. – Боиси жаҳоннинг кўплаб ривожланган давлатлари қишлоқ хўжалиги соҳасида юқори технологиялардан фойдаланмоқда. Уларни бошқариш учун камида инженерлик малакасини талаб қилинади. Иккинчидан эса, мамлакатимизда уруғчилик соҳасига жиддий эътибор қаратиш лозим.