Ўзбекистон давлат жаҳон тиллари университетида 5 февраль куни «Инглиз тилини ўқитиш ислоҳотида муҳим муваффақият омиллари ва вазифалари» мавзусида анжуман ўтказилди. Бу ҳақда ЎзА хабар бермоқда.
Британия Кенгаши, Ўзбекистон Республикаси Олий ва ўрта махсус таълим вазирлиги, университет ҳузуридаги Чет тилларни ўқитишнинг инновацион методикаларини ривожлантириш республика илмий-амалий маркази ҳамкорлигида ташкил этилган тадбирда олий ўқув юртларининг инглиз тили кафедралари раҳбарлари ва ўқитувчилари, Қирғизистон ва Қозоғистондан мутахассислар иштирок этди.
Анжуманда Буюк Британиядан инглиз тилини ўқитиш ислоҳотлари бўйича мутахассис Род Болайто, инглиз филологияси бўлмаган мутахассисликлар учун тил ўқитиш эксперти Жеф Стенфорд, Британия Кенгашининг замонавий методикага асосланган инглиз тили кўникмаларини баҳолаш бўйича эксперти Виктория Кларк соҳага оид турли мавзуларда тақдимотлар ўтказди. Тил ўқитиш ва баҳолашда ахборот-коммуникация технологияларидан фойдаланиш, узлуксиз касбий ривожланишнинг муҳимлиги, жумладан, устоз-шогирд дастурининг аҳамияти хусусида муҳокамалар ташкил этилди.
– 2018 йилда Ўзбекистоннинг 27 олий таълим муассасасида Британия Кенгашининг касбий ривожланиш марказлари очилди, – дейди Британия Кенгашининг Ўзбекистондаги ваколатхонаси инглиз тили лойиҳалари мувофиқлаштирувчиси Саида Эргашева. – Эндиликда ўқитувчилар ва талабалар учун махсус ўқув тренинглари ўтказилмоқда. Марказлар Британия Кенгаши томонидан тақдим этилган инглиз тилидаги касбий ривожланиш бўйича тўпламлар, бадиий адабиётлар ва видео материаллар билан таъминланган. Ушбу анжуман таълим соҳасида халқаро ҳамкорликни ривожлантиришга хизмат қилади.
Анжуманда таълим соҳасидаги ислоҳотларни амалга оширишда асосан 4 вазифага алоҳида эътибор қаратилди. Жумладан, инглиз тилига оид ўқув дастурлари, ўқув материаллар, малакали ўқитувчилар тайёрлаш, тест ва баҳолаш тизимини такомиллаштиришни ҳисобга олган ҳолда кейинги ислоҳотлар учун тавсиялар ишлаб чиқишдир. Британиялик мутахассислар инглиз тили кўникмаларини баҳолаш учун ишлаб чиқилган махсус тестлар ҳақида маълумот берди.
Икки кун давом этадиган анжуман доирасида иштирокчилар Бухоро давлат университетида инглиз тилини ўқитиш тизими ва касбий таълим марказларининг фаолияти билан танишади.
Изоҳ (0)