Жорий йил 24 январь куни соат 23:00 да Ғузор туманидаги 47-умумтаълим мактабининг 9-синф ўқувчиси Оғабек Қодиров ҳали қурилиши битмаган ҳовлисида ингичка арқонга осилган ҳолда топилган. Бу ҳақда «Дарё»га Оғабек Қодировнинг тоғаси Олим Қодиров маълум қилди.
Мурожаатдан сўнг, воқеа тафсилотларини ўрганиш мақсадида туманнинг Тошғузор қишлоғида бўлдик.
— 24 январь куни кечки соат 18:30 лар атрофида Оғабекнинг тоғасининг телефони «зарядка»да турган жойида жиринглади, — дейди Оғабекнинг тоғаси Олим Қодировнинг аёли Мунаввар Дониёрова. — «Оғабек, ким экан?», деб сўраганимда «Янга менга телефон қилишган экан», деди Оғабек. Ҳа, деб ишимда давом этдим. Кейин телефон яна жиринглади. Бу сафар Оғабек телефонда гаплашгач, югуриб кўчага чиқиб кетди. Кейин бир пас туриб телефон яна жиринглагач, ўзим телефонга жавоб бердим.Телефондан «Оғабекнинг онасимисиз», деган овоз келди. «Йўқ, мен Қувончнинг онасиман», деб ўғлимнинг исмини айтдим.«Мен Ҳафиза бўламан, Оғабек менинг телефонимни синдириб ташлабди», деди телефонда мен билан гаплашаётган киши. «Онаси бўладими, бобоси бўладими ёки момоси бўладими тез чақиринг менга», деди. «Хўп», деб телефонни ўчирдим. Ҳеч қанча вақт ўтмай яна телефон қилгач, қайнона-қайнотамга айтдим.
Мунаввар Дониёрова қўшниси Ҳафиза Жўраева тўртинчи маротаба телефон қилгач, 70 ёшли қайнотасининг кўзи яхши ўтмаслиги боис ҳам қайнотаси ва Оғабекнинг синглисини олиб қўшнисиникига борганини айтди.
«Қўшнимизнинг уйига яқинлашиб қолган пайтимиз, Ҳафиза опа бешинчи маротаба қўнғироқ қилиб, «Оғабекнинг фамилияси Қодировми, биз участкавойга ёзиб бермоқчимиз», деди. «Ҳафиза опа биз келдик, чиқинг» деганимиздан сўнг, Ражаб деган жияни ва янгаси Гулнора опа ҳамда Гулнора опанинг ўғли Мирёқуб билан чиқиб келди. Ҳафиза опа шунда янгасига қараб фамилиясини ёзиб олдингизми деди.
— Ҳақиқатдан ҳам ўша куни қўлимда дафтар ва ручка бор эди, — дейди Ҳафиза Жўраеванинг янгаси Гулнора Эшназарова. – Лекин ҳеч қандай ариза ёзганимиз йўқ эди. Ҳафиза опамнинг 2-синф қизининг дарсига ёрдамлашаётган эдим.
Суҳбатдош Мунаввар Дониёрованинг қўшимча қилишича, суҳбат давомида қўшниси Ҳафиза Жўраева жияни Ражабга «Кечки пайт Оғабек сенга қанча пул олиб келиб бераман деганди» деб сўраган, жиянининг «200 минг сўм» деган жавобини олгач, оғизга олиб бўлмайдиган сўз билан «сийлаб», Оғабекнинг бобоси Турсун бобо Қодировга «Бу телефонни мен 6 та қўй сотиб, пулига олганман», деган. «Шунда қайнотам қўшнимиз Ҳафиза Жўраевага воқеа ҳақида ҳозир хабар топаётганини, масалани ойдинлаштиришини агар набираси айбдор бўлса, эрталаб соат 7:30 да телефоннинг пулини олиб келишини айтди», — дейди Мунаввар Дониёрова.
— Ўша куни 4 бош қўй сотиб 2 нафар жиянимга телефон олиб берганман дедим, — дейди Ҳафиза Жўраева. – Мен телефон ёки пулни олиб кел демадим. Уйда ўтирган пайтим кечроқ бешлар атрофида Оғабек уйимиз ёнидан югуриб ўтиб кетди. Шунда «тарбияси бузилиб кетган бу бола бу ерда нима қилиб юрибди», деб жиянимдан сўрадим. Жияним «телефонингизни синдириб қўйди», дегач, Оғабекнинг янгасига телефон қилдим. Телефонга Оғабек жавоб берди. Шунда Оғабекка «Оғабек менинг олдимга бир кел-чи, нима бўлди ўзи» деб чақирдим. Оғабек «хўп, амма ҳозир бораман», деб телефонни ўчирди.
Суҳбат давомида Ҳафиза Жўраевадан нима учун Оғабек Қодировни тарбияси бузилиб кетган бола деб атаганининг сабабини сўрадик. «Ўтган йили мактабда компьютер йўқолган экан, Оғабек компьютерни ўғирлаб, тупроққа кўмганини эшитгандим-да», — дейди Ҳафиза опа. «Компьютерларни Оғабек ўғирлагани исботланганми» деб сўраганимизда Ҳафиза опа «Исботланган, фақат гап бўлмасин деб маҳалла ишни ёпди-ёпди қилган», деди.
— 24 йилдан бери 47-умумтаълим мактабида «завхоз» бўлиб ишлайман, — дейди Алишер Нуримов. – Ўтган йиллар давомида мактабдан компьютер йўқолгани йўқ-ку, нега энди ўлган кишига нисбатан бу даражада туҳмат қилишяпти? Билмаган ёки танимаган кишига марҳум шундай эди деса ишониб кетаверади-да. Яхшимас, бундай тубанликка бориш.
— Ўтган йили мактабдан ҳеч қандай компьютер йўқолмаган, — дейди мактаб директорининг маънавий-маърифий ишлар бўйича ўринбосари Саодат Саломова. – Оғабек ёмон иш қиладиган бола эмасди. Ўша 24 январь куни 9-синфга биринчи соат биология дарсим бор эди. Дарс давомида унда тушкунлик ёки бирор нарсадан сиқилиш ҳолатини кузатмадим. Дарсдан сўнг Ёшлар иттифоқи етакчиси ва психологнинг ташаббуси билан футбол мусобақаси уюштирилганди. Футбол ўйнади. Кейин тоғаси ва бобоси билан ер ағдарганини ҳам кўргандим. Машъум воқеа содир бўлгандан сўнг, Оғабекнинг бобоси телефон билан боғлиқ можаро ҳам чиққанлигини айтиб қолди. Балки ўша воқеалар унга қаттиқ таъсир қилган бўлиши мумкин.
— Оғабекни ўша куни телефон қилиб чақирганимдан сўнг ҳам келмади, — дейди Ҳафиза Жўраева. – Жиянимдан унга нима учун телефонни берганини сўраганимда, «мол боқиб юрганимда ўзи тортиб олди», деди. Кейин 2 соатларда телефонни олиб келган ва синдириб қўйганини айтган.
— Мол боқиб юрган пайтим, ёнимга келиб телефонимни тортиб олди ва кечки пайт соат бешларда синдириб олиб келди, — дейди Ҳафиза Жўраеванинг жияни Ражаб Ражабов.
11-синф ўқувчиси Ражаб Ражабовнинг аниқлик киритишича, Оғабек унинг телефонини синдириб қўйгач, таъмирлаш учун баҳор ойида албатта пул беришини айтган. «Қўлимдан тушиб кетди, баҳорда таъмирлаш учун икки юз минг сўм пул бераман деди», — дейди Ражаб Ражабов.
— Кечки пайт соат 20:00 да уйга келсам, Оғабек йўқ дейишди, — дейди Оғабекнинг тоғаси Олим Қодиров. — Кейин кўчага чиқиб излашга тушдим. Маҳаллани айланиб чиқдим, аммо тополмадим. Шунда қурилиши битмаган ҳовлисига кетганмикин деган хаёл ўтди. Ва ҳовли томон юрдим. Эшикни очиб ҳовлига кирдим. Қарасам, ёғочга суяниб тургандек кўринди. Ухлаб қолдимикин деб «Оғабек деб чақирдим». Индамагач, юрагим сесканиб кетди. Кейин бориб ушлаб кўрсам, бадани қотган. Тепага қарасам ингичка ипга осилган экан. Тезда пастга туширдим ва ерга ётқиздим. Кўтариб олиб келаман дегандим кучим етмади. Шунинг учун уйдагиларни чақирдим. Маҳалла имом хатибига хабар бердим. Ҳалигача шокдаман.
Ҳафиза Жўраева ҳамда янгаси Гулнора Эшназарованинг айтишича, Оғабек Қодиров охирги пайтлар мактабга ҳам бормай қўйган. «Кўпинча тўйларда камера кўтариб ёки қўшиқ айтиб юрганини кўрардик», — дейди Ҳафиза опа ва Гулнора Эшназарова.
— Дарс пайти юрганини билмадиму, аммо тўйларда хизмат қилиб юрарди, — дейди кўчабоши Хушвақт Муҳаммадиева. – Меҳнатдан қочмасди. Кимдир ўтинимни ёриб бер 10 минг сўм пул бераман деса ишни қилиб кетаверарди. Кўнгли очиқ бола эди. Лекин ўтган куни айни шу масалада бўлиб ўтган мажлисда «бу боланинг мактабда ўқишини билмасдик, ҳар доим камера кўтариб юрарди» деган гап ҳам бўлди.
— Оғабек деярли дарс қолдирмасди, — дейди синф раҳбари Нурилла Эргашев. – Тўғри, тирикчилик туфайли тўйларда хизмат қиларди. Аммо дарс пайти албатта дарсга қатнашарди. Тўйлар кўпинча дарсдан кейин бўлади-ку.
— Набирам санъатга қизиқарди, — дейди Оғабекнинг момоси Фотима Сатторова. — Меҳнат қилишдан чарчамасди. Онасига ёрдамчи бўлишни истарди. Бутун маҳаллага нафи тегарди. Тўй-ҳашамларда хизмат қилиб юрарди.
Маълум бўлишича, Оғабек Қодиров синглиси ва онаси билан ёшлигидан тоғасининг уйида бобоси ва момосининг тарбиясида улғайган. Онаси Марғуба Қодирова эса тирикчилик сабаб 10 кунлаб Қарши шаҳридаги ошхоналарда меҳнат қилиб келган. Мактаб директорининг ўринбосари Саодат Саломованинг айтишича, мактабдаги ота-оналар йиғилишига ҳам бобоси қатнашиб келган. Онаси деярли турмуш ташвишларидан ортмаган. «Одатда ўғлимнинг арзимаган нарса учун хафа бўладиган одати йўқ эди», — дейди унинг онаси Марғуба Қодирова.
— Оғабек хушчақчақ ва бировдан ёрдамини аямайдиган бола эди, — дейди Ёшлар иттифоқи етакчиси Венера Жумаева. – Ўзимиз ҳам ҳайронмиз. Нега бундай воқеа содир бўлди? Балки, ўша кунги телефон билан боғлиқ воқеа руҳиятига қаттиқ таъсир қилганмикин?
Оғабекнинг синфдошлари Меҳрибону Ихтиёрова, Дилшод Улашов ва Асадбек Акбаровлар ҳам синфдошининг кайфиятида тушкунлик ҳолати сезилмаганини, доимо хушчақчақ юришини айтмоқда.
Бўлган воқеа хусусида маҳалла профилактика инспектори Абрўй Турсоатовнинг фикри билан қизиқдик. Аммо тополмадик. Қўнғироқ қилганимизда эса «Раҳбарларимиз рухсат бермагунча, ҳеч қандай маълумот беролмайман» деган жавобни эшитдик.
Кези келганда шуни ҳам алоҳида таъкидлаш керакки, Оғабек Қодировнинг момоси, тоғаси, янгаси ва мактаб ўқитувчиларининг баъзилари ҳам маҳалла профилактика инспекторини яхши танимаслигини, профилактика инспекторининг уйи шу ерда жойлашган бўлса-да, ўзи ушбу ҳудудда яшамаслигини таъкидлашди. Уларнинг гапи қанчалик тўғри ёки нотўғри эканлигини билмадигу, аммо инспектор Абрўй Турсоатов учун мўлжалланган хизмат уйига борганимизда биз ҳам уйда ҳеч ким йўқлигига гувоҳ бўлдик. Балки иш билан чиқишгандир. Буниси бизга қоронғи.
Оғабек Қодировнинг тоғаси Олим Қодировнинг маълумот беришича, маҳалла профилактика инспекторига воқеа ҳақида ўша куни хабар берилган. Туман ИИБнинг хабари бор бундан. Жасадни ҳам экспертиза учун олиб кетишган.
P.S. Мақола чоп этилишидан олдин маҳалла профилактика инспектори Абрўй Турсоатов билан боғланишнинг уддасидан чиқдик. Профилактика инспектори бўлган воқеани тасдиқлади. Унинг сўзига кўра, иш билан айни пайтда туман прокуратураси шуғулланаяпти. Бошқа тафсилотлар эса уларга маълум эмас.
Туман прокуратураси билан телефон орқали боғланганимизда, ўзини таништиришни ҳам истамаган ходим айни дамда ҳеч қайси раҳбар ўзида эмаслигини айтиб, ОАВга маълумот тақдим этолмаслигини билдирди.
Изоҳ (0)