Ҳозирги пайтда мавжуд туберкулёз экспресс-тестларининг сезгирлиги бўйича ўтказилган йирик тадқиқот шуни кўрсатдики, улар етарли аниқликка эга эмас ва имкониятлари чекланган. Британия олимлари ҳозирги кундаги тестларнинг сезувчанлик даражаси 67 фоиздан 81 фоизгача эканлигини исботлади. Бу ҳақда Лондоннинг Империал коллежи сайти хабар бермоқда.
Бутунжаҳон соғлиқни сақлаш ташкилоти берган маълумотларга кўра, 2017 йилда туберкулёз билан 10 миллиондан ортиқ инсон касалланган. Шулардан 1,6 миллиони вафот этган. Касалликнинг тезкор диагностикаси кам самарадор эканлигини ҳисобга олиб, олимлар жамоаси янги диагностик тест — қон орқали текширувни яратди. Тест 94 фоиз аниқлик билан ҳозирда мавжуд барча тестларнинг кўрсаткичларини ортда қолдирди.
Бугунги кунда тубекулёз диагностикаси беморнинг балғами ва инвазив биопсия материалини озуқа муҳитида ўстирилгандан сўнг аниқланади ва диагноз бир неча ҳафтадан сўнг тасдиқланади. Манфий натижалар эса доим ҳам туберкулёз диагнозини инкор қилмайди, чунки айрим беморлардан олинган биологик материалдаги туберкулёз бактериялари озуқа муҳитида ўсмаслиги мумкин. Бу эса касаллик эътиборсиз қолиб кетишига сабаб бўлади.
Янги усулда бемордан олинган қон намунасига қўшилган гамма-интерферон (IGRA) тубекулёз бактериясининг иммун жавобига қараб ташхис тасдиқланади. Натижалар шуни кўрсатдики, янги анализ усули сезиларли даражада самарадор бўлади ва инфекцияга шубҳа бўлган ҳолларда уларни инкор қилишга ёрдам беради.
Янги метод биргина Буюк Британия соғлиқни сақлаш тизимининг 2 миллион фунт стерлинг (2,5 миллион доллар) маблағини тежаб қолади.
«Текширувларимизга кўра, бугунги кунда қўлланиладиган туберкулёз экспресс-тестлари фаол туберкулёз диагностикаси учун етарли самарадорликка эга эмас ва шу сабабдан уларни амалиётда қўллаш мумкин эмас. Тадқиқот натижалари муҳим клиник аҳамиятга эга бўлиб, келажакда янги усулни клиник амалиётда қўллашга асос ҳисобланади.», — дейди профессор Лалвани.
Агар мавжуд усуллар сезгирлиги паст бўлса, унда нега биз ҳали-ҳануз улардан фойдаланяпмиз? Сабаби — туберкулёз диагностикасига бўлган талаб шу даражада юқорики, қўл остимиздаги бор имкониятлардан тўлалигича фойдаланишга мажбурмиз. Умид қиламизки, келажакда янги метод клиник амалиётга жорий қилинади ва туберкулёз билан касалланганларга ўз вақтида аниқ диагноз қўйиб, даволашда муҳим ёрдамчига айланади.
Изоҳ (0)