Шотландияда тарихдаги энг қадимий кимёвий элементлар жадвали топилди

Шотландияда 1968 йилдан буён ҳужжатлар йиғилган архивни тозалаш чоғида Менделеев даврий жадвалининг 1885 йилда чоп этилган нусхаси топилди. Бу ҳақда TJournal хабар берди.

Немис тилидаги ўқув қўлланма Венада 1875—1888 йилларда ишлаган илмий типографияда нашр этилган.

Ўша вақтда барча кимёвий элементлар очилмаган бўлган ва жадвалда кўплаб элементлар қолдириб кетилган. Масалан, 1895 йилда очилган гелийнинг жадвалда йўқлигини кўриш мумкин.

Кимёвий элементлар жадвалда рақамланмаган. Бугунги кунда эса атом рақами ядродаги протонлар сони ва унинг зарядини аниқловчи асосий хусусиятлардан бири ҳисобланади.

1875 ва 1879 йилларда очилган галлий ва скандий жадвалда бор, 1886 йилда очилган германий эса унда мавжуд эмас. Унинг ўрнида — бешинчи қаторда галлий (Ga) ва мишьяк (Аs) ўртасида қўлда ёзилган сўроқ белгиси турибди, бироқ унинг атом массаси тўғри кўрсатилган. Бу элементнинг мавжудлигини Менделеев 1870 йилда башорат қилган, бироқ у 1886 йилдагина очилган.

Инерт газлар қатори эса умуман мавжуд эмас.