Шавкат Мирзиёевнинг Германияга ташрифи, Жамшид Кенжаев иши бўйича бошланган суд, Қашқадарёда ёғган 1 метрлик қор ва куннинг бошқа муҳим хабарлари

21 январнинг эътиборга молик хабарлари — «Дарё» дайжестида.

Ўзбекистон Республикаси Президенти Шавкат Мирзиёев 20 январь куни расмий ташриф билан Германия пойтахти Берлин шаҳрига келди.

Германияда ўқиётган, илмий изланишлар олиб бораётган бир гуруҳ ўзбекистонлик ёшлар Берлин шаҳрида Шавкат Мирзиёевни катта хурсандчилик билан кутиб олди.

Белвю саройида Президент Шавкат Мирзиёев билан Президент Франк-Вальтер Штайнмайернинг учрашуви бўлиб ўтди.

Сўнг Шавкат Мирзиёев ва Германия Федерал канцлери Ангела Меркелнинг музокаралари олдидан оммавий ахборот воситалари вакиллари учун брифинг ўтказилди.

Шундан кейин Ўзбекистон Республикаси Президенти Шавкат Мирзиёев 21 январь куни Германия Федерал канцлери Ангела Меркель билан музокара ўтказди.

***

Тошкентда орадан беш ой ўтиб «Aurum 898» тунги клубида ўлдирилган спортчи Жамшид Кенжаев иши бўйича биринчи суд эшитуви бошланди.

«Судланувчилар курсисида тунги клубнинг тўрт нафар қўриқчиси. Залда эса — Кенжаевнинг отаси ва беваси», — дейилади хабарда.

***

Қашқадарё вилоятининг Сурхондарё билан чегарадош Деҳқонобод туманидаги Ойбек тоғи ён-бағирларида ёққан қор қалинлиги салкам бир метрга етган.

Маҳаллий аҳолининг таъкидлашича, бу ҳудуд учун қалин қор тушиши ноодатий ҳодиса.

Деҳқонобод туманидаги Дўконхона ва Оқработ қишлоқларида ёққан қор манзараси акс этган фотоларни нашр эълон қилди.

***

Тошкентда жиноят содир этганлиги учун қидирувда бўлган бир гуруҳ шахслар ушланди. Улар қўлга олиш чоғида фаол қаршилик кўрсатган.

Тошкент шаҳар ИБББ ходимлари тезкор-қидирув тадбирларини ўтказиш давомида 26 яшар Воҳид Тошматовнинг яшаш жойи аниқланди. Бир неча бор судланган бу шахс жорий йил 14 январда Фарғона вилоят ИИБ томонидан фирибгарлик жиноятини содир этгани учун қидирувга берилганди

Тошматовни қўлга олиш чоғида унинг квартирада бирга бўлган қариндошлари ИИББ ходимларига фаол қаршилик кўрсатди, икки нафар ходимга тан жароҳати етказилди. Ёрдамга етиб келган қўшимча наряд Тошматов билан бирга жами 10 кишини қўлга олди.

***

Гарвард битирувчиси Ольга Понкратова Навоий тоғ-металлургия комбинати директорининг ўринбосари этиб тайинланди.

У Ўзбекистондаги давлат органларига хорижий инвесторларни жалб этиш бўйича тавсиялар, Invest in Uzbekistan, вольфрам кластери концепцияларини ишлаб чиққан. Лойиҳа-бошқарув миллий агентлиги учун давлат тоғ-кон активлари аудитини ўтказган, уларда солиқ ислоҳотларини ўтказиш масалаларида иштирок этган.