2018 йилнинг ноябрь ойида «Дарё» мухбири Миролим Исажоновнинг «Шароф Рашидов қурдирган кутубхона жар ёқасида. Унга ким қўл чўзади?» номли танқидий мақоласи эълон қилинган эди. Унда атоқли давлат арбоби ва ёзувчи Шароф Рашидов ташаббуси билан 1982 йили Андижон вилоятининг Шаҳрихон туманидаги «Баркамол авлод» маҳалласида қад ростлаган кутубхонанинг кун сайин ачинарли ҳолатга келаётгани ҳақида атрофлича фикр юритилганди.
Суриштирувимиз давомида мазкур масала бўйича Андижон давлат тиббиёт институти ректори Мадамин Мадазимов билан боғланганимизда, у мазкур кутубхона институт балансидан чиқарилиб, Шаҳрихон туман ҳокимлиги балансига ўтказилганини таъкидлаганди.
Орадан бир ярим ой вақт ўтиб, таҳририятимизга мазкур мақола юзасидан Андижон давлат тиббиёт институти ректори Мадамин Мадазимов имзоси билан ёзилган жавоб хати келди. Аслида Шаҳрихон туманида институт балансидаги кутубхона иккита бўлган. Аввал туманнинг «Найнаво» МФЙдаги 2-шаҳобча кутубхонаси олий таълим даргоҳи балансидан чиқариб юборилган. Ректор эса мухбиримиз суриштирувида англашилмовчилик туфайли 1-шохобча кутубхонасини балансдан чиқарилган, дея жавоб берган.
«Дарё» сайтида эълон қилинган мақоладан сўнг Шаҳрихон тумани «Баркамол авлод» МФЙда жойлашган 1-шохобча кутубхонасининг китоб фондини янада кўпайтиришга ҳамда аҳолига кутубхона хизмати кўрсатиш даражасини яхшилашга алоҳида эътибор бериб келинмоқда. Шохобчада институт ходимлари томонидан ободонлаштириш ишлари амалга оширилди. Кутубхона атрофлари тозаланиб, дарахтлар тартибга келтирилди, ер майдонлари юмшатилди. Мазкур кутубхонага шу соҳада кўп йиллик тажрибага эга I.Ортиқова кутубхоначи сифатида ишга қабул қилинди. Айни пайтда уч миллион сўмлик бадиий адабиётлар харид қилиниб, шохобчага бериш кўзда тутилмоқда. Вилоят архитектура давлат назорат инспекцияси томонидан кутубхона бўйича техник хулоса олиниб, ҳужжатлар тайёрланди ва жорий йилда тўлиқ таъмирланадиган бўлди.
Биз мазкур мурожаат хатида таъкидланганидек, кутубхонанинг таъмирланиб, янада чирой очишини кутиб қоламиз ва мавзуга яна қайтамиз.
Изоҳ (0)