Юнусободдаги чўкиб бораётган уй, Ўзбекистонни очликдан қутқарган ҳарбий авиация, Каъба ёпинчиғининг Самарқанддаги бир парчаси ва куннинг бошқа муҳим хабарлари

15 январнинг эътиборга молик янгиликлари — «Дарё» дайжестида.

Юнусобод тумани 15-мавзедаги 72 хонадон яшайдиган уй кун сайин чўкиб бормоқда.

«Йил сайин чўкаётган уйнинг чекка томони икки тарафга ажралиб қолган. Хонадонда иситиш батареялари бўлгани билан исимайди. Куз-қиш мавсумида хонадонлар совуқ бўлиб кетади. Газ ёқиб  исинишга мажбурмиз. Иситиш мосламасиз хонадонда ўтириб бўлмайди. Назаримда бирор фалокат юз бермагунча ҳеч ким бу муаммога эътибор бермайдигандек», — деб ёзади Севара Худойбердиева.

***

Каримов фонди: Биринчи Президент сақлаб қолган ҳарбий авиация Ўзбекистонни очликдан қутқарганди.

Президент Каримов 1992 йил 7 февраль куни Мудофаа вазирлиги тасарруфидаги барча кўчар ҳамда кўчмас мулклар хусусийлаштириш ва давлат тасарруфидан чиқариш жараёнига жалб этилмаслиги тўғрисида буйруқ берди. Айни шу фармон билан Ўзбекистон Республикаси ҳудудидан қурол-аслаҳа, техника ва асбоб-ускуналарни олиб чиқиб кетиш ҳам тақиқланди.

Иқтисодиёт инқироз ёқасига келиб қолган, ёш давлат мураккаб тарихий даврни бошдан кечирар эди. Мустақиллик эълон қилинганидан кўп ўтмай Президент Каримовга мамлакатда атиги 7-10 кунга етадиган дон-дун қолгани ва очарчилик ҳавфи келиб чиқиши мумкунлиги борасида маълум қилинади. Ислом Каримов донни шошилинч равишда бошқа мамлакатлардан келтириш борасида буйрук беради. Масала долзарб экани ва уни жуда тез муддатда ҳал этиш лозим бўлгани сабаб, биринчи босқичда бу вазифа Каримовнинг қатъий саъй-ҳаракатлари туфайли сақлаб қолинган ҳарбий-транспорт авиацияси самолётлари томонидан муваффақиятли бажарилади. Кейинроқ эса мамлакатга темирйўл транспорти орқали барқарор тарзда озиқ-овқат келтириш йўлга қўйилади.

***

Ўзбекистонда Каъбанинг ёпинчиғидан парча бор.

Самарқанд музей-қўриқхонасининг фондида узоқ йиллардан бери сақланадиган экспонат – қабр пўш эътибордан четда қолаётгандек.

Фондга қабул қилинадиган буюмлар қайд этилган китобда «Қабр пўш – Каъба устига ёпилган, араб ёзувлари туширилган қора матонинг парчаси» дейилган.

Инвентар қайдлар китобида ҳам у Саудия Арабистони, Маккадан келтирилгани ёзилган. Ушбу маҳсулотни 1933 йил 13 августда экспедиция ўтказаётган Самарқанд музейи илмий ходимлари Г.П. Снесарев ва М.С. Юсупов Бухоро шаҳридаги темир йўл станциясида фуқаро Ф. Шукурбоевадан 30 рублга сотиб олишган.

***

Суриялик курдлар қўлга олинган ИШИД жангариларини Ўзбекистонга топширишга тайёр.

SDF (Курдлар томонидан шаклланган «Сурия Демократик Кучлар») асирлигида 40 га яқин мамлакатлардан Сурияга келган мингдан ортиқ ИШИД жангарилари сақланмоқда. Бундан ташқари улар билан бирга келган аёллар, оилалари ҳам бор. Улар орасида МДХ мамлакатлари фуқаролари, хусусан, Ўзбекистон ва Тожикистон фуқаролари ҳам бор.

***

Instagram᾽да тухум сурати бир неча кун ичида 25 миллиондан зиёд лайк тўплаб, янги рекорд ўрнатди.

Шу кунга қадар америкалик модель Кайли Женнер қизалоғи Сторми билан тушган сурати Instagram оламидаги энг машҳур сурат ҳисобланарди. Ушбу сурат 18 миллиондан зиёд лайк тўплашга муваффақ бўлган.