Ўзбекистонда фото ва видеога олиниши тақиқланган объектлар, жамоат жойлари ва ҳудудлари рўйхати 1 февралга қадар тасдиқланиши лозим. Ўзбекистон Президенти Шавкат Мирзиёев «Ўзбекистонда туризмни тезкор ривожлантириш бўйича қўшимча чора-тадбирлар тўғрисида»ги фармонида Ички ишлар вазирлигига шундай топшириқ берган, деб ёзади «Газета.uz».
Рўйхат Мудофаа вазирлиги, Давлат хавфсизлик хизматининг Чегара қўшинлари ва бошқа манфаатдор вазирлик ва идоралар билан биргаликда ишлаб чиқилиши лозим. Рўйхат тасдиқланганидан сўнг, Қорақалпоғистон Вазирлар Кенгаши, вилоятлар ва Тошкент шаҳри ҳокимликлари фото ва видеосуратга олиш тақиқлангани камида иккита хорижий тилда (инглиз, рус ва бошқа) кўрсатилган лавҳачаларни 1 мартга қадар ўрнатиб чиқиши лозим.
Фармонда алоҳида қайд этилишича, тақиқлов белгилари (лавҳачалари) бўлмаган жойларда фото- ва видеосъёмка «ҳеч бир чекловларсиз» амалга оширилади.
Қайд этиб жоиз, 1 июндан Тошкент метрополитенида фото- ва видеосуратга олишга нисбатан тақиқ бекор қилинган эди.
Изоҳ (0)