Сирдарё вилояти Сайхунобод туманида 5 январь куни инсон ўлими билан боғлиқ ёнғин юз берди. Бу ҳақда Давлат ёнғин хавфсизлиги хизмати хабар бермоқда.
Хабар беришларича, «Бахмалсой» маҳалласи ҳудудидаги фермер хўжалигига қарашли дала майдонида жойлашган «Гулистондавсувмахсуспудрат» корхонасига тегишли ишчи ходимларнинг дам олиш учун мўлжалланган темир вагонида ёнғин содир бўлган.
Кўрилган чоралар натижасида ёнғин ўчирилган. «Ёнғин натижасида вагоннинг ёғоч қопламаси ёниб зарар кўрган ҳамда Гулистон туманида яшаган, корхона ишчиси бўлган М.М.нинг куйган ҳолдаги жасади топилган», — дейилади ДЁХХ ахборотида.
Қайд этишларича, ҳозирда ёнғиннинг келиб чиқиш сабаби ва моддий зарар миқдори аниқланмоқда. Ҳолат юзасидан суриштирув ишлари олиб борилмоқда.
Изоҳ (0)