Туркманистонда янги қонун кучга кирди, унга кўра аҳолисининг катта қисмини мусулмонлар ташкил қиладиган мазкур мамлакатда алкоголь маҳсулотларининг сотуви кескин чекланади, деб ёзади ЎзА.
Қонунга кўра, 1 январдан бошлаб поезд, самолёт ва паромларда, шунингдек спорт иншоотларида алкоголь маҳсулотлари сотилмайди, қолаверса миллий байрамлар вақтида алкоголь сотиш тақиқланади.
2021 йилдан бошлаб шанба ва якшанба кунлари бар ва ресторанлардан ташқари бошқа жойларда алкоголь маҳсулотларини сотиш тақиқланади.
«Алкогольнинг зарарли таъсирини олдини олиш тўғрисида»ги Қонун 2018 йил декабрь ойида қабул қилинди. Ҳужжат матнида таъкидланишича, қонун алкоголнинг зарарли таъсирини олдини олиш мақсадида давлат сиёсатининг ҳуқуқий, ташкилий ва иқтисодий асосларини белгилаб беради ва фуқаролар соғлиғини муҳофаза қилишга, соғлом турмуш тарзини шакллантиришга қаратилган.
Туркманистон президенти Гурбангули Бердимуҳамедов соғлом турмуш тарзи тарғиботчиси сифатида кўрилади. Унинг спорт билан шуғулланиб туриши акс этган суратлар мунтазам чоп этиб турилади, давлат раҳбари мамлакатда оммавий спорт ташаббускори ва тамакига қарши курашчи сифатида намоён бўлади.
Ҳукумат 2025 йилга бориб Туркманистонни тўлиқ чекишдан холи мамлакатга айлантириш режасини эълон қилди.
Изоҳ (0)