Ўзбекистон Қуролли Кучлари вазирлик ва идоралари ҳамда ҳуқуқни муҳофаза қилувчи идоралар вакиллари ўртасида ўқ отиш спорти бўйича «Миллий олимпия қўмитаси кубоги» мусобақаси ўтказилди. Мусобақа Ўзбекистон Мудофаа вазирлиги Спорт клубининг ўқ отиш тири мажмуасида ташкил этилди, деб хабар беради вазирлик матбуот хизмати.
Янги йил арафасида ўтказилган мусобақада ҳарбий хизматчилар ва Қуролли Кучлар хизматчилари ўзларининг мерганлик борасидаги маҳоратларини намойиш қилди. Уларни тажрибали ҳакамлар кузатиб, баҳолаб борди.
Якуний натижаларга кўра, МВ-9 «А» йўналишида аёллар ўртасида Мудофаа вазирлиги вакили Александра Юркевская, эркаклар орасида Мудофаа вазирлиги вакили Хусниддин Элмуродов ғолибликни қўлга киритди.
ПП-1 ҳамда Мп-5 «А» йўналишларида эса Мудофаа вазирлиги вакиллари Лариса Холмаматова (аёллар ўртасида) ва подполковник Жаҳонгир Шайматов (эркаклар орасида) биринчиликни эгаллади.
ВП-3 йўналишида аёллар ўртасида Мудофаа вазирлиги вакили Александра Юркевская биринчиликни эгаллаган бўлса, эркаклар орасида Давлат хавфсизлик хизмати вакили Жаҳонгир Ходжиев шоҳсупанинг энг юқори поғонасидан жой олди.
Изоҳ (0)