Конгресс Мексика билан чегарадаги девор қурилиши учун беш миллиард доллар ажратишни назарда тутувчи бюджет тўғрисидаги қонун лойиҳасини қабул қилмаганидан сўнг, АҚШнинг бир неча вазирликлари фаолияти қисман тўхтаб қолди, дея хабар бермоқда Meduza.
Ушбу ҳолат, хусусан, Ички хавфсизлик вазирлиги, Транспорт вазирлиги, Ички ишлар вазирлиги, Адлия вазирлиги, Давлат департаменти, NASA агентлиги ва Миллий парклар хизматига дахл қилади. 800 мингга яқин ходим маош олишни тўхтатади, улардан 380 минг нафари ишга чиқишни тўхтатади, қолгани эса текинга ишлайди.
Мексика билан чегарадаги девор қурилиши учун пулни бюджетга киритишни АҚШ президенти Дональд Трамп талаб қиляпти. Айтишича, у девор қурилиши учун пул кўзда тутилмаган бюджетни имзоламайди ва айни шу масала сабаб ҳукуматнинг иши тўхтатиб қўйишдан «фахрланади».
Маълумот учун, бу 2018 йил ҳисобидан АҚШ ҳукумати фаолиятини молиялаштириш жараёни тўхтаб қолиши билан боғлиқ учинчи ҳолат. Мексика билан чегарада девор қуриш эса Дональд Трампнинг энг асосий сайловолди ваъдаларидан бири эди.
Изоҳ (0)