КХДР қамоқхонасидан чиқиб вафот этган америкалик талабанинг оиласи 1 млрд доллар товон пули талаб қилди

КХДРдаги қамоқхонада озодликка чиққач, вафот этган америкалик талаба Otto Вомбиернинг ота-онаси мамлакат ҳукуматидан 1 миллиард доллар товон пули ундириб бериш ҳақидаги даъво билан судга мурожаат қилди, деб хабар берди «Интерфакс».

Вомбиернинг оиласи 2018 йилнинг апрелида Колумбия округидаги судга шикоят аризаси билан мурожаат қилиб, КХДР талабани ноқонуний тарзда ҳибсда ушлаб тургани оқибатида унинг вафот этганини баён қилди.

Қайд этилишича, ўша пайтда даъво аризасида компенсация миқдори кўрсатилмаган эди.

Марҳум талабанинг ота-онаси даъво аризасини ўзгартириб, КХДРдан бир миллиард доллар товон пули ва 46 миллион доллар маънавий зарар ундириб беришни талаб қилмоқда.

Қайд этилишича, ушбу сумма КХДРнинг 2015 йилдаги ялпи ички маҳсулоти ҳажмининг 2,5 фоизига тенг.

Otto Вомбиер КХДРга сайёҳ сифатида ташриф буюрган эди. У меҳмонхона деворидан сиёсий плакатни йиртиб ташламоқчи бўлгани учун 15 йилга озодликдан маҳрум этилган эди. У судда айбини тан олган, шундан сўнг «Корея халқи бирдамлигини бузишга уринганликда» айбдор деб топилган.

Давлат департаменти иштироки билан у 13 июнь куни озодликка чиқарилган ва 19 июнь куни вафот этган эди.