Ўзбекистонга сайёҳ сифатида келиши мумкин бўлган давлатларни таҳлил қилган ҳолда, мамлакатнинг туризм салоҳиятини тарғиб қилувчи ягона тарғибот стратегиясини ишлаб чиқиш вақти келди, дейилади ЎзА хабарида.
Бунинг учун Ўзбекистоннинг туризм салоҳиятини кўрсатувчи Миллий брендни ишлаб чиқиш ҳамда барча вазирлик ва идоралар учун ягона тарғибот қилиш механизми йўлга қўйилиши лозим. Шунингдек, миллий туристик маҳсулотларни жаҳон бозорига олиб чиқиш, уларнинг рақобатбардошлигини таъминлаш мақсадида маркетинг кампаниясини ишлаб чиқиш зарурияти юзага келмоқда.
Бу борада албатта, хорижий давлатлардаги ўзбекистонликларнинг салоҳиятидан ҳам унумли фойдаланиш зарур. Бунда хорижий давлатлардаги дипломатик ваколатхоналар муҳим аҳамият касб этиши шубҳасиз.
Эндиликда туризм соҳаси инфратузилмаси, жумладан маданий мерос объектларидан самарали фойдаланиш куннинг энг муҳим вазифаси бўлиб қолади. Бироқ, бу бордаги ишлар кўнгилдагидек, эмаслиги Туризмни ривожлантириш давлат қўмитасининг йиғилишида алоҳида қайд этилди.
Мисол учун, маданий мерос объектларига ташриф буюрувчи туристлар ҳисобини юритиш ҳали ҳам эскича тизимда олиб борилиши, шаффоф ва замонавий ҳисоб юритиш тизимлари ишламаётгани туфайли ташриф буюрувчиларнинг сони тўлиқ аниқланмасдан қолмоқда.
Солиштириш учун мисоллар асосида таҳлил қилиб кўрамиз. 2017 йилдаги маълумотларга кўра, Регистон мажмуасига 525 минг киши ташриф буюргани қайд этилган. Айни вақтда жаҳонга машҳур бошқа объектлар Тож Маҳалга (Ҳиндистон) – 6,5 миллион, Аё Софияга (Туркия) – 1,9 миллион киши ташриф буюрган.
Келгусида бу борада аниқ-ҳисоб китоблар юритиш учун маданий мерос объектларига келувчи сайёҳларнинг сонини мониторинг қилиб бориш, уларнинг талабларини доимий ўрганиб бориш учун ушбу объектларни замонавий технологиялар билан жиҳозлаш лозим. Хусусан, объектларга кириш назорати ва чипта сотиш тизимини онлайн режимда ишлашини йўлга қўйиш мақсадга мувофиқ.
Келгуси йилда айрим туризм зоналарда маданий мерос объектларини қайта таъмирлаш, уларни ободонлаштириш ҳам талаб этилади. Ваҳоланки, айни вақтда Ўзбекистоннинг турли ҳудудларида ана шундай объектларга нисбатан эҳтиётсизлик муносабатлари мавжуд бўлгани учун уч юздан ортиқ иншоот авария ёки ташландиқ аҳволга келиб қолган.
Изоҳ (0)